IMPAGANETGET ti ABS-CBN ti suportana ken ni Angel Locsin kalpasan a nalaokan iti kontrobersia ti planado a pannakarambak ti kasangay daytoy babaen ti community pantry.
Kuna ti nasao a network a mamatida iti kinaimbag ti panagpuspuso ti aktres nga iti personal a kabaelan daytoy, namin-adun a timmultulong kadagiti kakailian iti tiempo ti didigra.
Innayon ti nasao a network a lugayanna ti panagkari ni Angel nga itultuloyna ti panagserbina kadagiti Filipino.
Maipalagip nga idi Abril 23, 2021, rinambakan ni Angel ti kasangayna babaen ti community pantry. Daksanggasat ta ad-adu ngem iti ninamnamana ti dimmar-ay a nagbanag iti nakaat-atiddog a pila ken kinariribuk dagiti pimmila. Nairana pay a natay ti maysa a nataengan gapu iti pudot.
BROADCAST MEDIA: Asino ni Shalimar?
Dimmawat iti pammakawan ni Angel ket inakona ti kamali, idinto a dinawatna ti di koma panangpabasol dagiti tattao kadagiti sabsabali pay a community pantry.
Iti biang ti kaaduan a Filipino, saan a basol ni Angel ti napasamak. Naibalakad ketdi a maliklikan koma ti panagdudupudop dagiti tattao tapno maliklikan dagiti saan a nasayaat a pasamak, kas iti panagwaras ti COVID-19. (REGGEE BONOAN)
(Bannawag, Mayo 16-31, 2021)
