Agtultuloy ti panagawat dagiti health frontliners iti pagilian nga agserserbi kadagiti pasiente iti coronavirus iti special risk allowance manipud iti gobierno.
Pinirmaan ni Presidente Duterte ti Administrative Order No. 42 a mangipalubos iti agtultuloy a pannakaipaay ti COVID-19 Special Risk Allowance (SRA) kadagiti para publiko ken para pribado a health workers nga agserserbi kadagiti pasiente ti COVID-19 bayat ti kaadda ti pagilian iti kasasaad a nailian nga emerhensia (national emergency).
Daytoy special risk allowance a saan a lumbes iti P5,000 iti kada bulan a maited kadagiti health frontliners ket immuna nga inaprobaran ti Presidente iti babaen ti AO 36 a nayetnag itay napan a tawen. Daytoy nga alawans, a mailaksid iti income tax, sakupenna ti tiempo a Septiembre agingga iti Disiembre 2020.
Iti babaen ti baro a bilin ti Presidente, inikkanna iti bileg dagiti nailian nga ahensia ti gobierno, dagiti korporasion a kukua wenno kontrolado ti gobierno, ken dagiti lokal a yunit ti gobierno nga itultuloyda nga ited ti COVID-19 SRA a kas ituding dagiti nayetnag a reglamento ken kondision.
TURISMO: Intayon Idiay Ayuyang Garden iti Pila, Siudad ti Laoag!
Amendaran daytoy AO 42 ti immun-una a bilin a daytoy pannakaipaay ti SRA ket pro-rated segun iti bilang dagiti aldaw a pisikal a nagreport dagiti frontline health workers iti trabaho iti kada bulan a makontar manipud iti Septiembre 15, 2020 agingga iti Hunio 30, 2021.
Amin a maala nga SRA, masapul a paneknekan ti Department of Health no husto met laeng a frontliner ti nakaitedan daytoy.
Nailanad iti baro a bilin a ti agtultuloy nga State of Public Health Emergency, ipalubosna ti agtultuloy a pannakaipaay ti COVID-19 SRA a kas pammigbig iti natan-ok ken saan a magatadan a kontribusion dagiti health workers iti sibubukel a pagilian, a situtured ken sisasagana a mangisebba iti biag ken salun-atda babaen ti kaaddada iti sanguanan dagiti nailian a gannuat a mangsaranget iti angol.
Dagiti pondo a kasapulan para iti pannakayimplementar ti AO 42 ket maala iti P13.5-bilion a nailatang para kadagiti gannuat a mainaig iti salun-at, kas sagudayen ti Republic Act No. 11494 wenno ti Bayanihan to Recover As One Act.
Binilin pay ti Presidente ti Department of Budget and Management a ruk-atanna dagiti pondo a para iti SRA segun kadagiti agdama a reglamento iti panagilatang iti pondo.
Daytoy a bilin a pinirmaan ti Presidente iti Hunio 1, 2021, Martes, dagus a maipakat apaman a maipablaak iti Official Gazette wenno iti pagiwarnak.
(Damdamag manipud iti mb.com.ph)
