APARRI, Cagayan – Gapu iti nakapsut a signal ti internet, napilitan ti maysa a teacher-in-charge iti maysa nga eskuela iti elementaria iti Isla Fuga nga umuli iti bantay tapno laeng makadar-ay iti maysa a virtual management committee meeting.
Inreport ti Cagayan Provincial Information Office idi Mayo 28, 2021, Biernes, a sumagmamanon nga inaramid daytoy ni mannursuro George Agarpao, officer-in-charge ti Sitio Bubog Elementary School iti Barangay Fuga.
Kinuna ni Agarpao a masapul nga umuli iti bantay a mangtantannawag iti taaw tapno makaala iti signal; iti kasta, makadar-ay iti online a miting wenno taripnong. Kalpasanna, itugawna iti sanga ti kayo tapno napigpigsa pay ti maalana a signal.
Innayon ni Agarpao a masapul nga agsakripisio tunggal mangiwayatda iti miting ta awan ti signal ti telekomunikasion kadagiti uppat a pagadalan ti elementaria iti nasao nga isla-a-barangay.
Manipud Kadagiti Agdama a Kameng ti Bannawag: Dios ti Agngina!
Iti ladawan (a nailukon iti daytoy nga artikulo) nga imbinglay ni Agarpao iti Cagayan Provincial Information Office, makita daytoy a nakatugaw iti sanga ti maysa a kayo bayat ti idadar-ayna iti virtual management committee meeting ti SDS Cagayan.
Mangnamnama ni Agarpao a sumaayat ti kasasaadda iti Cagayan babaen ti tulong ti nasional a gobierno.
Adda ti Isla Fuga iti Amianan a Luzon ken paset ti Babuyan archipelago. Iti agdama, mangipaspasdek ti Philippine Navy iti maysa a naval station iti isla.
(Damdamag manipud iti mb.com.ph)
