Ni VILLAMOR C. VISAYA, JR.
NALATAK iti sidong ti internet ti online dating wenno panagdeyt. Ngem ita, adda maar-aramid iti internet a nakatiliw iti imatang ti adu a netizens a nakaigapuan met ti ingangato ti kidayda: daytoy kaadda dagiti sugar daddies ken sugar mommies nga addaan iti nawadwad a pirak a sisasagana a tumulong kadagiti babbalasang wenno babbaro a kas kasukat ti panagbalinda a sugar babies.
Maysa kadagiti nalatak a website ti sugarbook.com, ti makunkuna a kadakkelan a sugar daddy wenno sugar mommy dating site a mangus-usar iti makaallukoy a tagline a, “where romance meets finance (no sadino nga agsabat ti lailo ken pirak).” Malaksid iti daytoy, panggep kano ti website ti panagam-ammo dagiti agpada a nataengan nga addaan iti naan-anay a panunot para iti nasingked (natibker) a relasion iti sidong ti online.
Iti maysa nga interbiu iti telebision, imbatad ni Darren Chan, chief executive officer ti Sugarbook, a sinuktan ti website ti sigud a galad a mainlab nga umuna sakbay a mapagtutungtongan ti pirak.
Iti datos ti nasao a website, maysa ti Filipinas kadagiti adda iti Top 3 a mangus-usar iti serbisio ti kompania. Iti kano sangariwriw nga aktibo a miembro, agarup 126,985 dagiti sugar babies idinto a 33,156 dagiti sugar daddies ken sugar mommies, kaaduan kadagitoy ti agindeg iti Metro Manila, Central Luzon, Central Visayas, ken Northern Mindanao. Naipasdek ti website iti online idi Enero 2017 a kas pagliwliwaan a dating site dagiti mabalin nga agayan-ayat babaen ti online. Ngem saan a nagklik. Naminsan, nabasana kano iti online a 40 a porsiento dagiti agayan-ayat ti sumrek iti relasion no natalged ti pagbiagan wenno pirak a mabusbos. Isu a sinuktanna ti sistema ti online site babaen ti sugar daddy/mommy-sugar baby a konsepto. Limmatak idi agangay.
Adda pay maysa a padana a site a kunada a limmatak, ti Seeking, a nangrugi met idi 2006 iti Estados Unidos. Adda pay ti AshleyMadison a site iti Canada. Ngem ti Sugarbook ti ad-adda nga am-ammo dagiti Pinoy.
Libre ti ag-sign up iti site ngem tapno addaan iti premium a membership, masapul ti P1,438 a bayad iti binulan! Apounayen! Talaga a saan a para kadagiti mangurkuranges daytoy!
Ammo kano ti site administrator nga adda dagiti naasawaan a kameng a sugar daddies wenno sugar mommies ngem masapul nga ibutaktakda tapno ammo dagiti sugar babies ti sasaadenda. Agtawen iti 18 agingga iti 34 kano dagiti kameng a babbalasang, balo, nakisina, naganak a balasang ken dadduma pay a sugar babies. Agarup 46 a porsiento kano dagiti estudiante a makasapul iti pirak tapno masustenerda ti panagadalda. Impanamnama met ti site a saan a guest relations officer, prostitutes wenno babbai nga adda iti kabaret dagiti babbalasang ta awan ti pinnilitan kadagiti dua nga agayan-ayat babaen ti online no di ketdi boluntario a nagsarak laeng. Kaaduan kano nga estudiante dagiti kameng a sugar babies.
Dagus ngarud a nangipaulog iti surat ti Philippine Commission on Women (PCW) a mangbalballaag kadagiti babbalasang gapu iti panagraira ti sugar dating wenno makuna a relasion ti sugar daddy-sugar baby. Nakiddaw pay ti panangimbestigar ti Kongreso iti daytoy babaen ken ni Senador Leila de Lima tapno di kano mairareb ti moralidad dagiti babbai. Ngem saan pay a naisayangkat daytoy gapu iti panangasikaso dagiti agpampanday-linteg iti pandemia.
Ngem damagem man ketdi kadagiti kakabagian ken gagayyemmo no natalged met laeng daytoy a banag kadagiti babbalasang. Ay, ket naaweng la ketdi dagiti sungbatda a “Saan!” --O
(Bannawag/ Abril 16-30, 2021)
