Mabakunaanen kontra iti COVID iti mabiit dagiti ubbing nga agad-adal iti Singapore, segun ken ni Prime Minister Lee Hsien Loong idi Lunes, Mayo 31, 2021, kalpasan a namallaag dagiti opisial a dagiti baro nga strain ti bayrus, ad-adda nga apektaranda dagiti ubbing.
Itay nabiit, immiget ti nasao a siudad-estado gapu iti apagapaman a panagngato dagiti bilang ti kaso, kalpasan ti sumagmamano a bulan a sangkabassit laeng ti naireport a pannakaakar iti lokalidad.
Karaman iti panagiget ti panagiserra kadagiti eskuelaan gapu kadagiti pagilasinan a dagiti baro a variant, kas iti naduktalan iti India, inapektaranda ti naruay a bilang dagiti ubbing.
TURISMO: Intayon Idiay Ayuyang Garden iti Pila, Siudad ti Laoag!
Iti bitla a naipabuya iti telebision, impakaammo ti prime minister a dagiti estudiante nga agtawen iti 12 ken natataeng, isuda ti sumaruno a grupo ti mabakunaan.
Itoy a bulan, inaprobaran dagiti health regulator ti bakuna a Pfizer/BioNTech para kadagiti agtawen iti 12 agingga iti 15. Sakbayna, naipalubos laeng kadagiti agtawen iti 16 ken natataeng.
Kuna ni Lee nga iti daytoy kaudian a panagngato ti kaso, ad-adu dagiti ubbing a naakaran, kadagiti eskuelaan ken tuition centres.
Innayonna a saan met a nakaro ti panagsakit dagiti ubbing, ngem nangipaay daytoy iti pannakaburibor kadagiti nagannak. Daytoy ti gapuna a ti bakasion iti Hunio, gundaway tapno mabakunaan dagiti estudiante.
Segun kadagiti opisial, dagiti nasurok a 400,000 nga estudiante ti siudad, mabalindan a rugian ti ag-book iti pannakabakunada mangrugi iti Martes, idinto a mabakunaan dagiti umuna a grupo iti Huebes.
Kalpasan dagiti estudiante nga ubbing, mabakunaan metten dagiti nataengan nga agtawen iti 39 ken naub-ubing—ti maudi a grupo a masapul a mabakunaan iti daytoy nabaknang a siudad-estado a pagnaedan ti 5.7 milion katao.
Kuna pay ni Lee a manamnama a palukayan ti Singapore ti kaudian a panagigetna kalpasan ti Hunio 13, kas plano, bayat ti panagsuek dagiti pannakaakar iti lokalidad. Karaman iti panagiget ti dua-katao ti mapalubosan iti taripnong ken pannakaipagel ti pannangan iti uneg ti restawran/panganan.
No idilig iti sangalubongan, saan unay a nakaro ti angol iti Singapore—iti pannakasursurat daytoy, nasurok laeng a 62,000 a kaso ti naireport a pakairamanan ti 33 a natay manipud rugi ti pandemia.
(Damdamag manipud iti https://mb.com.ph/)
