MAISAYSAYANGGUSENG nga umakaren iti Kapamilya Network ni Lovi Poe. Saan pay a naipakaammo ta posible a mayuray pay a malpas ti maipatpatangatang a teleserye nga “Owe My Love” iti GMA-7 a pagbidaan ni Lovi ken da Rocco Nacino ken Benjamin Alves.

Iti pannakaisursurat daytoy, adda iti Amerika ni Lovi ta binisitana ti nobiona a ni Montgomery Blencowe.

Adda pay sayangguseng a ni Lovi ti mapispisel nga agbida iti bersion iti Filipino ti teleserye a “Doctor Foster.” No pagbasaran ti orihinal nga istoria, mabalin a ni Ian Veneracion ti kapareha daytoy idinto a ni Julia Barretto ti agakem a bullilising.

Tagiurayentayo man ti opisial a pakaammo no addanto kinapudnona dagitoy a sayangguseng.

*     *     *

Inako ni Kiko Estrada iti “Magandang Buhay” a nagsinadan ken Devon Seron a kaayan-ayatna.

Sa innayonna nga iturongna ti imatangna iti career-na.

Kuna met ni Cheska Diaz nga ina daytoy a dina bibiangan ti pannakiayan-ayat ti anakna.

*     *     *

Iti vlog ni Erich Gonzales, kuna ni Alora Sasam iti panag-guest daytoy a karaman ni Charo Santos-Concio kadagiti arapaapna a makatrabaho.

Inayonan met ni Erich nga uray isu, kalikagumanna met a makatrabaho koma iti teleserye wenno pelikula.

Kunana a nakasarsaritana iti nabiit pay ni Charo ket kunana a nasayaat a kasarsarita daytoy ta nakabagbagas no agsasao.

Malaksid iti daytoy, kuna ni Alora a kayatna pay a makadua iti trabaho ni Judy Ann Santos.

Dagus met la nga inayonan manen ni Erich. Segun iti daytoy, napalalo ti panangdayawna ken ni Judy Ann ta kabaelan daytoy nga aramiden ti amin nga akem. Iti panagkuna ni Erich, talaga a naisangrat ni Judy Ann a para iti industria ti showbiz. (REGGEE BONOAN)

(Bannawag, Mayo 16-31, 2021)