SIUDAD TI LAOAG – Tallo a gunglo dagiti mannalon iti Dingras, Ilocos Norte ti nakapauli iti dandani ag-4 a milion a pisos manipud iti apitda a balatong.
Iti naudi a panagbuburas, mapan a 100 a mannalon iti balatong iti nasao nga ili ti nakaapit iti agarup 61 a tonelada a balatong a nailako iti 3.9-milion a pisos.
Personal nga inyawat kadakuada a cash ti mangimaton iti Nutridense Food Manufacturing Corporation nga addaan iti tallo-tawen a memorandum of agreement kadagiti tallo a gunglo dagiti mannalon, ti CSDCS (Casalaysayan, Segundo, Dancel, Camiring and Soriano) Farmers Association Inc., Lanas Timpuyog Farmers Association Inc., ken United Barong Farmers Association.
Nagatadan iti 64 a pisos ti kada kilo, adda nayon a 9 a pisos a naganar dagiti mannalon manipud iti Nutridense no idilig iti agdama a presio iti merkado a 55 a pisos ti kada kilo a paggatang dagiti dadduma a negosiante.
TURISMO: Intayon Idiay Ayuyang Garden iti Pila, Siudad ti Laoag!
Kinuna ni Mark Ariel Agresor, lider ti proyekto, a maigapu ti balligi dagiti mannalon iti balatong iti ili a Dingras iti panagtinnulong ti sektor pribado ken publiko tapno mapaksiat no di man matellay ti kinakurapay, kas inkari ni Presidente Rodrigo Roa Duterte kadagiti napalabas nga state of the nation address daytoy.
Paset pay daytoy ti agtultuloy a panagsukisok para iti programa iti panagdur-as ti Department of Agriculture (DA) a mangtarabay kadagiti komunidad nga ad-adda a pagay/irik ti produktoda a mangnayon iti maganarda babaen ti panagmulada kadagiti sabsabali pay a mula. Iti biang dagiti mannalon iti Dingras, balatong ti immulada kalpasan ti umuna ken maikadua a panagtalonda.
Kuna ni Agresor nga idi damo, agduadua dagiti mannalon ngem babaen ti pannarabayda a kas koma iti panangisuroda kadakuada kadagiti baro a teknolohia, naalada ti suporta dagitoy, manipud iti pannakaisagana ti daga, panagmula, panagburas, agingga iti pannakailako dagiti apitda.
(Damdamag manipud iti Manila Bulletin.)
