Rugian ti gobierno nasional ti pannakabakuna dagiti economic frontliners, ken dagiti nakurapay nga umili, wenno ti A4 ken A5 a priority sectors, kas panagsaganadda, iti daytoy umay a Lunes, Hunio 7.
Kuna ni Secretary Carlito Galvez, Jr., vaccine czar ken pangulo ti pannakayimplementar ti National Task Force (NTF) Against COVID-19, itay Mierkoles, Hunio 2, a naaprobaran ti pannakabakuna dagiti sektor nga A4 ken A5 tapno ad-adda pay a mapapartak ti pannakabakuna ti lima a milion a puntiria ti gobierno a bakunaan iti daytoy a bulan.
Kuna ni Galvez a nayetnag ti desision bayat ti miting ti Inter-Agency Task Force for the Management of Emerging Infectious Diseases (IATF-MEID), ti gunglo ti gobierno a mangbukbukel kadagiti pagalagadan mainaig iti COVID.
Iti innuman iti “Headstart” iti ABS-CBN, kuna ni Galvez a maawagan iti symbolic rollout daytoy maiwayat a panagbakuna iti daytoy Hunio 7. Dar-ayan daytoy dagiti opisial ken sekretario. Kinapudnona, isaysayangkaten ti kaaduan nga LGU (local government unit) daytoy ta masapul a maprotektaran dagiti mangmangged.
Manipud Kadagiti Agdama a Kameng ti Bannawag: Dios ti Agngina!
Iti napalabas a Labor Day itay Mayo 1, nangiwayat ti gobierno iti “mini-rollout” a nakabakunaan ti agarup 5,000 nga A4 a mangmangged nga agsusueldo iti minimum ken dagiti overseas Filipino workers (OFW). Ti adatna laeng, kuna ni Galvez nga iti nasao a petsa, lepleppasen pay laeng ti IATF dagiti pagalagadan a masurot iti pannakabakuna dagiti sektor nga A4 ken A5 isu a saan a namimpinsan a nayimplementar daytoy.
Pagimbaganna, innayon ni Galvez a nakompleton dagiti pagalagadan a pagbasaran dagiti LGU iti pannakabakuna dagiti economic frontliners ken nakurapaynga umili.
Innayonna nga iti pannabakuna ti A4 ken A5, mabingay iti dua a grupo: dagiti agtawen iti 40 agpangato ken dagiti agtawen iti 39 agpababa.
Dinakamatna nga iti miting ti nasao a gunglo, napagnunumuanda a mayun-una ti grupo dagiti agtawen iti 40 agpangato gapu ta nalaklaka a kapten ti sakit dagitoy ken agtomtomardan iti para maintenance.
Innayon pay ni Galvez a dagiti kualipikado iti A4 a sektor ket dagiti economic frontliners wenno dagiti mangmangged iti pribado, gobierno, ken impormal kas kadagiti drayber ken agtrabtrabaho kadagiti pagtagilakuan.
Iti nalawlawag a pannao, dagiti kualipikado isu dagiti mangmanged iti pribado a sektor a kasapulan ti kaadda iti lugar a pagtrabahuanda iti ruar dagiti pagtaenganda; dagiti empleado kadagiti ahensia ti gobierno a pakairamanan dagiti government-owned and controlled corporations (GOCC) ken local government units; ken dagiti mangmangged iti impormal a sektor ken self-employed a kasapulan nga agtrabaho iti ruar ti pagtaengan, ken dagiti agtrabtrabaho kadagiti pribado a pagtaengan.
Iti innuman idi Mayo 18, kinuna ni Galvez a ti panagbakuna kadagiti A4 ken A5 maiwayat pay laeng iti “NCR Plus 8” wenno iti Metro Manila, Bulacan, Cavite, Pampanga, Batangas, Laguna, Rizal, Metro Cebu, ken Metro Davao. Maibilang dagitoy a maipangruna a lugar gapu ta kadagitoy a lugar ti pakasarakan iti adu a nakaala iti sakit ken napartak ti panagiinnakar.
Maibasar iti rekord ti National Economic and Development Authority (NEDA), kuna ni Galvez nga iti laengen NCR-Plus, adda aganay a 13 milion katao iti A4 a kategoria idinto a 8.5 milion katao met iti A5 a kategoria.
Dinakamat ni Galvez a naaprobaran daytoy pannakabakuna ti A4 ken A5 kalpasan a naisigurado ti pagilian ti umdas a suplay ti bakuna itay Mayo.
Iti naudi a rekord iti Mayo 30, nakaawaten ti gobierno iti 8.3 milion a dosis ti bakuna, a ti 8.1 milion kadagitoy, naiwarasen idinto a ti aganay a 200,000 a dosis, naireserba para iti maikadua a dosis. Ti nasurok a kagudua ti nadakamat a suplay wenno mapan a 4.3 milion a dosis, naideliber itay Mayo.
Damdamag manipud iti Manila Bulletin.
