BANI, Pangasinan – Linuktanen ti gobierno munisipal dagiti pagpannakkel daytoy a disso kadagiti saan a residente manipud idi Martes, Hunio 1.
Iti maysa nga innuman, kuna ni Romel Dulay, municipal tourism officer ti nasao nga ili a dagiti turista a saan nga agnaed iti Pangasinan, masapul a mangipakitada iti negatibo a reverse transcription-polymerase chain reaction (RT-PCR) test ken balido nga ID (identification card).
Innayon ni Dulay nga amin a saan a residente iti Bani a mapan agpasiar iti nasao nga ili, masapul nga agrehistro iti Tourist Pass System ti Pangasinan para iti contact tracing, kas imbalakad ti Department of Tourism.
Kinuna ni Dulay nga umisu laeng ti tiempo a pananglukatdan iti ili ta dagiti mangmangged iti turismo, masapul a makaabrotdan iti dakkel a pukawda gapu iti angol (pandemia). Agtalinaedda ketdi a naalibtak kontra iti coronavirus disease 2019 (COVID-19) babaen ti naiget a pannakayimplementar dagiti health protocols ket mangnamnamada nga agtungpal met dagiti turista.
Manipud Kadagiti Agdama a Kameng ti Bannawag: Dios ti Agngina!
Dinakamat ni Dulay nga itantandudo ti ili ti eco-tourism malaksid kadagiti natatarnaw a baybay daytoy.
Segun kenkuana, addaanda kadagiti kabakiran a bakawan, gukayab (kueba), ken pinsal (falls) ken dadduma pay.
Innayonna nga adda met naiplastar a food park tapno makapagserbi kadagiti turista.
"Magagarankami a mangpasangbay manen kadagiti turista," kinunana.
(Damdamag manipud iti Manila Bulletin.)
