Binigbig ni Prime Minister Justin Trudeau ti Canada ken dadduma pay a dadaulo ti saan a magatadan a kontribusion dagiti Filipino nga ipapaayda iti nasao a pagilian.
Iti mensahe ni Trudeau manipud iti Filipino Canadian National Congress iti rugi ti pannakarambak ti Filipino Heritage Month, dinakamatna nga iti daytoy a bulan, rambakanda ti adu a kontribusion nga impaay ken ipapaay ti adu a Filipino-Canadian iti sibubukel a pagilian ken iti komunidad dagitoy.
Innayonna a para kadakuada, ti bulan ti Hunio ket oportunidad a maammuan dagiti amin nga agindeg iti Canada ti nabaknang a historia dagiti Filipino, ken maabrasa ti kulturada, ta iti tunggal aldaw, ar-aramiden dagiti Filipino ti pagilian a Canada a nasaysayaat a lugar a pagindegan.
Kinuna met ti Minister of Diversity and Inclusion and Youth, ken Kameng ti Parliament (Waterloo) a ni Bardish Chagger a bigbigenda ti kinagaget ken kinaandur dagiti komunidad a Filipino iti pagilianda.
TURISMO: Intayon Idiay Ayuyang Garden iti Pila, Siudad ti Laoag!
Innayon daytoy nga iti rugi ti Filipino Heritage Month, isu ti gundaway a maitampok dagiti saan a magatadan a kontribusion a naipaay ken ipapaay dagiti Canadian nga addaan dara a Filipino kadagiti tay-ak ti kagimongan, ekonomia ken kultura ti Canada.
Kinunana pay nga iti daytoy a bulan ken kadagiti masungad pay, bigbigenda dagiti komunidad a buklen dagiti addaan darana a Filipino ken rambakanda ti napateg nga akem dagitoy iti pannakaparnuay ti silulukat, agduduma ngem saan a mangidaddadduma a kagimongan.
Dinakamat met ni Jagmeet Singh, MP, pangulo New Democratic Party ti Canada, dagiti naibinglay dagiti komunidad a Filipino kadagiti tay-ak ti pannakataripato ti salun-at, serbisio, ken panagnegosio.
Kabayatanna, ginutigot ni Philippine Ambassador to Canada Rodolfo Robles dagiti Filipino nga itultuloyda a pabaknangen ti kultura ken tradision ti nasao a pagilian.
Iti agdama, addaan ti Canada iti nasurok a 800,000 a katao nga addaan darana a Filipino, maysa kadagiti kapartakan a dumakkel a komunidad iti nasao a pagilian.
Malagip nga idi Nobiembre 2017, nagkaykaysa ti Toronto City Council a nangikeddeng a marambakan ti Hunio iti kada tawen a kas Filipino Heritage Month.
Damdamag manipud iti Manila Bulletin.
