Mapan a 1,800 kilo nga okra ti naibiahe iti South Korea babaen ti Philippine Airlines (PAL) a maibilang a “milestone” para iti agri-business sector ti Filipinas.
Naibiahe daytoy a kargamento ti okra ti Filipinas–umuna iti daytoy a nasao a nateng iti Korea–manipud iti Manila nga agturong iti Incheon iti biahe a PR8648 ita nga aldaw ti Domingo, Hunio 6.
Babaen ti maysa a pakaammo, nadakamat a napateg daytoy a biahe para iti agri-business sector ti Filipinas. Yanninaw daytoy a dagiti baro a merkado–kas iti Korea– mangipapaayda kadagiti oportunidad iti negosio kadagiti sektor ti panagtalon ken panageksport.
Sakbayna, mayeks-eksport ti okra iti Japan. Itay Mayo, impakaammo ni Department of Agriculture (DA) Secretary William Dar a rugian ti pagilian ti agyeksport iti nasao a nateng iti sabali pay a kaarruba iti Asia—ti Korea.
TURISMO: Intayon Idiay Ayuyang Garden iti Pila, Siudad ti Laoag!
Kuna ti pangulo ti DA nga aggapu dagiti mayeksport a kappuros ken berde nga okra iti probinsia ti Tarlac a yan dagiti talon nga akreditado ti nasao nga ahensia. Ditoy metten a maipakete dagiti okra.
Sipud pay idi 2014 a kidkiddawen ti gobierno ti Filipinas iti Korea ti pannakaipalubos ti panagyeksport iti okra iti nasao a pagilian.
Kas pangrambak iti naikalawa a panageksport iti okra, naiwayat ti maysa a seremonia ti panagpalubos iti agsapa ti Domingo iti PAL International Cargo Terminal.
Ti nasao a pannakapalubos ti kargamento a 1,800 a kilo ti okra, sinaksian da Sekretario Dar, Department of Trade and Industry (DTI) Secretary Ramon Lopez, ken pannakabagi dagiti sabsabali pay nga ahensia ken gunglo a kas iti Philippine Chamber of Commerce and Industry, Bureau of Plant Industry, Philippine Okra Producers and Exporters Association.
(Damdamag manipud iti Manila Bulletin.)
