Saan a kasapulan para iti maysa nga overseas Filipino worker (OFW) ti pannakabakuna iti COVID-19 tapno makapan iti Singapore.
Daytoy ti kuna ti Department of Labor and Employment (DOLE) idi kalman, Hunio 6, kalpasan a nakaawat iti pammasingked manipud iti Labor Attache iti Singapore a ni Saul De Vries.
Kuna ni De Vries a nupay isaysayangkat ti gobierno ti Singapore ti naiget a quarantine protocols gapu iti ilulutuad manen ti pannakaakar ti COVID-19 iti lokalidad, saan a paset ti pannakabakuna kadagiti arrival protocols iti nasao a siudad-estado.
Nupay kasta, segun ken ni De Vries, ipakat ti gobierno ti Singapore kadagiti agsangpet a trabahador ti 21-aldaw nga institutional quarantine ken panangalada iti RT-PCR (reverse transcription-polymerase chain reaction) test iti mamitlo a daras.
TURISMO: Intayon Idiay Ayuyang Garden iti Pila, Siudad ti Laoag!
Kalpasan ti ilulutuad manen dagiti kaso iti Singapore, kuna ni De Vries a temporario a sinunspende ti gobierno ti Singapore ti panagaprobar kadagiti aplikasion iti iseserrek dagiti ganggannaet a mangmangged manipud kadagiti pagilian nga adu kadagiti umilina ti naakaran iti COVID-19.
Mangnamnama ni De Vries a marepaso dagitoy a pagalagadan iti daytoy a Hulio no bumaba ti kaso dagiti maaddaan iti COVID-19 iti Singapore.
Maibasar iti rekord ti DOLE, mapan a 200,000 a mangmangged a Filipino ti adda iti Singapore. Iti daytoy a bilang, kaaduan wenno mapan a 180,000 ti propesional, skilled worker, mangmangged kadagiti pagtaengan, mangmangged iti salun-at, ken dagiti agtrabaho iti industria ti turismo ken information technology.
Damdamag manipud iti Manila Bulletin.
