Paspasayaaten dagiti agsuksukisok iti pagilian ti mula a makabukay a kas agas kontra iti tumor ken kas taraon. Impakaammo ti Department of Science and Technology-Philippine Nuclear Research Institute (DOST-PNRI) itay Lunes, Hunio 7.
Iti maysa a paskil iti Facebook, kuna ti DOST-PNRI a babaen ti mutation breeding, agpatpatanor dagiti agsuksukisok iti barayti ti mula a makabukay tapno agbalin met a kas taraon a kas kadagiti nalatak a "kakasinsinna" a kas iti pagay ken mais.
Maibatay iti paskil, gapu kadagiti adu a nasayaat a talugading ti makabukay, agus-usar dagiti agsuksukisok ti PNI iti radiation technology tapno makaparnuayda iti barayti a makapataud iti ad-adu nga apit iti napampandek a katayagna; iti kasta, nalaklaka a patan-ayen ken apiten.
Segun iti PNRI, ti makabukay nga am-ammo pay kas Job’s tears, mamindua a nabakbaknang iti protina ngem iti pagay.
Manipud Kadagiti Agdama a Kameng ti Bannawag: Dios ti Agngina!
Kuna pay ti paskil nga addaan daytoy kadagiti saguday a kontra tumor ken dadduma pay a talugading a makatulong a mangpaimbag kadagiti sintoma iti alerdyi ken komplikasion ti diabetes. Malaksid iti daytoy, am-ammo pay ti makabukay iti kinaandurna kadagiti nakaro a kasasaad ti klima.
(Damag manipud iti Manila Bulletin.)
