Beijing, China – Inaprobaran ti China para iti emerhensia a pannakausar ti bakuna iti COVID-19 para kadagiti ubbing a ti kaubingan, agtawen iti tallo, kas pinatalgedan ti nangpartuat iti Sinovac idi Martes, Hunio 8. Ti nasao a nasion ti kaunaan a pagilian a mangipaay iti bakuna kadagiti babasit pay nga ubbing.
Manipud iti damo nga ilulutuad ti coronavirus iti China, impamaysa ti Beijing ti nangimaton iti panangkontrol iti pandemia iti nasao a pagilian. Nakaipaayen iti nasurok a 777 a milion a dosis ti bakuna.
Maysa a pannakabagi ti Sinovac ti nangipakaammo kadagiti kameng ti prensa a naaprobaranen ti bakuna daytoy nga usaren para kadagiti ubbing manipud agtawen iti tallo agingga iti sangapulo ket pito.
Saan ketdi a pinatalgedan daytoy no kaano a maipaayan dagiti ubbing iti bakuna ta ti iskediul daytoy, ikeddeng pay ti National Health Commission kas maibatay iti agdama a panagkasapulan para iti pannakalapped ti epidemia, ken kas maibatay iti suplay ti bakuna.
Manipud Kadagiti Agdama a Kameng ti Bannawag: Dios ti Agngina!
Kuna ti pannakabagi ti Sinovac a nakompleto ti kompania dagiti umuna a pannakaipadas ti bakuna kadagiti ubbing ken agtutubo, a dagiti resulta dagitoy, maipablaak iti mabiit iti Lancet scientific journal.
Iti arinunos ti napalabas a lawas, inreport ti CCTV, telebision a kukua ti estado, a maysa a di pay nainaganan nga opisial ti epidemic response task force ti State Council, ti nagkuna a naaprobaranen dagiti bakuna a para kadagiti ubbing, ken napaneknekanen ti kinatalged ken kinasamay dagitoy.
Kuna met ti pannakabagi ti Sinopharm a sabali pay a kangrunaan a bakuna iti China nga naipakitan ti kinaepektibo ti bakuna daytoy kadagiti ubbing, ngem di napatalgedan daytoy no naaprobaranen ti pannakausarna kadagiti ubbing.
Kuna dagiti opisial ti China a puntiriada a mabakunaan ti 70 a porsiento ti populasion daytoy a 1.41-bilion iti arinunos ti tawen.
Agpada nga inaprobaran ti World Health Organization (WHO) dagiti bakuna a Sinopharm ken Sinovac para iti emerhensia a pannakausar daggitoy kadagiti nataengan nga agtawen iti sangapulo ket walo ken natataeng, ken dagiti agpada a bakuna, maus-usaren kadagiti nadumaduma a pagilian iti sangalubongan.
Nupay saan pay nga irekrekomendar ti WHO ti pannakabakuna dagiti ubbing kontra iti coronavirus, inaprobaranen ti United States, Britain, Singapore ken ti European Union ti bakuna a Pfizer-BioNTech para kadagiti ubbing nga agtawen iti 12 ti kaubingan.
(Damdamag manipud iti Manila Bulletin.)
