Tapno makatulong a mangrisut kadagiti problema dagiti madagdagulit a risgo iti danum gapu kadagiti dakes a paniempo, nangipaay ti Department of Science and Technology (DOST) iti agarup pitopulo a milion a pisos a badiet para iti pannakaipasdek ti impraestruktura para iti danum iti Tanap ti Cagayan.
Mausar ti nasao a pondo iti SMART Water Infrastructure and Management (SWIM) iti babaen ti Niche Centers for R&D (NICER) Program ti DOST.
Iti maysa a pakaammo idi Mierkoles, Hunio 9, kuna ti DOST a ti SWIM R&D ket proyekto iti babaen ti NICER a naigagara a mangyam-ammo kadagiti baro a pamuspusan iti water management babaen ti panangipasdek iti water research center nga agyan iti unibersidad tapno mangiwayat kadagiti programa iti panagyadal iti R&D ken capacity building iti sektor ti rekursos iti danum ken dagiti karayan, ken mangipaay kadagiti serbisio iti technical extension.
Kabayatanna, impeksa ni DOST Secretary Fortunato T. de la Peña ti panagyamanna iti Isabela State University (ISU) iti panangiwayat daytoy iti napateg ken apagisu a panagsukisok a makatulong iti rehion a mangsolbar kadagiti parikutna iti impraestruktura ken pannakaiwardas ti danum.
Manipud Kadagiti Agdama a Kameng ti Bannawag: Dios ti Agngina!
Impeksa pay ni De la Peña ti sibubukel a suportana iti proyekto ket impalagipna ti epekto ti nakaro a layus bayat ti yaay ti bagyo nga Ulysses idi Nobiembre itay napan a tawen.
Kuna ti DOST a ti center, tulonganna ti rehion a mangrisut kadagiti problema kadagiti maulit-ulit a risgo iti danum gapu iti dakes a paniempo ta mangipapaay kadagiti pannakadadael dagiti sanikua iti agrikultura.
Iti panangsaranget kadagiti kastoy a risgo iti danum, kuna ti DOST a ti center, mangisayangkat iti uppat nga agtitinnulong a proyekto iti R&D a pakairamanan ti (1) Smart Water Resources Planning and Development of Water Resources Projects and Interventions; (2) Integrated Assessment and Analysis of Hydraulic Assets for Sustainable and Resilient Flood Control Infrastructures; (3) GIS-Based Decision Support Tool in Managing, Monitoring and Applying Intervention of Water Infrastructure for Smart Cities: Case for Cauayan City; ken (4) Smart Water Control Infrastructures for Effective Irrigation Management.
Kuna ti DOST a maipakat dagitoy a programa iti uneg tallo a tawen. Maisayangkat daytoy iti rehion ti Tanap ti Cagayan ket ti ISU ti kangrunaan a mangiwayat iti pannakitinnulong dagiti State Universities and Colleges (SUCs) iti rehion, dagiti ahensia a katinnulong ti gobierno, ken dagiti lokal a yunit ti gobierno.
Kabayatanna, impeksa met ni DOST-II Regional Director Engr. Sancho A. Mabborang ti sibubukel a suportana iti proyekto babaen ti panangipasingkedna nga umawat ti ISU iti umisu a pondo ken tarabay.
Babaen ti mandato daytoy a mangipaay kadagiti sientipiko a solusion kadagiti makapakarit a problema, impasingked ti DOST nga agtultuloy daytoy a mangipaay iti sangapagilian a direksion, liderato ken koordinasion dagiti sientipiko ken teknologo iti pannakaipasdek dagiti naan-andur a komunidad iti pagilian.
Damdamag manipud iti Manila Bulletin.
