Nagpakaasi ti Department of Health (DOH) kadagiti umili a dida koma palsipikaren ti kasasaad ti salun-atda tapno laeng dagus a mabakunaanda kontra iti coronavirus disease (COVID-19).
Impasingked ni DOH Undersecretary Maria Rosario Vergeire nga amin a kualipikado nga umili iti pagilian, mabakunaanda kontra iti COVID-19.
Mainaig iti daytoy, kuna ni Vergeire (Biernes, Hunio 11) a saan ngarud a masapul a palsipikaren dagiti dokumento wenno agsalawasaw ti maysa a tao nga adda sakitna ta maipaayan met latta iti batang a mabakunaan; ngamin, karbenganna daytoy.
Segun ken ni Vergeire, nakaawatda kadagiti report manipud kadagiti rehional nga opisina a sumagmamano nga umili ti nangidatag kadagiti palsipikado a dokumento nga addaanda kadagiti sagubanit (comorbidities).
Manipud Kadagiti Agdama a Kameng ti Bannawag: Dios ti Agngina!
Dinakamat ni Vergiere a daytoy ti gapuna nga adda screening kadagiti lugar a pagbakunaan a posible a pakatiliwan dagiti addaan iti peke a dokumento wenno pakatakuatan nga agsalsalawasaw ti maysa a tao maipanggep iti kasasaad ti salun-atna.
Binallaagan ti nasao a pannakangiwat ti DOH a mamulta dagiti mangallilaw maipapan iti kasasaad ti salun-atda.
Iti agdama, sakupen ti programa ti panagbakuna kontra iti COVID-19 dagiti grupo nga A1 agingga iti A4, kas panagsasaganadda: medical frontliners, senior citizens, people with comorbidities, ken essential workers.
Dagiti addaan iti sagubanit (comorbidities), mabalinda ti mangidatag kadagiti sumaganad a kas pammaneknek iti kasasaadda: medical certificate manipud iti doktor, reseta para kadagiti agas, record iti ospital a kas iti discharge summary ken medical abstract; wenno rekordna a kas operada, ken pathology reports.
Iti rekord agingga iti Hunio 8, addan 373,493 nga addaan iti comorbidities a naipaayanen iti kompleto a bakuna; idinto a 1,568,809 a katao ti nakaawaten iti umuna a dosis.
(Damag manipud iti Manila Bulletin.)
