Impalagip ti Department of Science and Technology (DOST) idi kalman (Huebes, Hunio 10) a dagiti laeng indibidual nga agtawen iti 18 ken natataeng ti mapalubosan a makipartisipar kadagiti vaccine trials iti pagilian. Impalagip daytoy a napateg unay ti panangala kadagiti umuna a datos sakbay nga ipadas met ti ania man a bakuna kadagiti naub-ubing a grupo ti populasion.
Sakbayna (Hunio 8), pinatalgedan ti Department of Health (DOH) nga inaprobaranen ti Food and Drug Administration (FDA) ti pannakausar ti bakuna a Pfizer-BioNTech COVID-19 kadagiti agtawen iti 12 agingga iti 15.
Babaen ti opisial a pakaammo, kuna ni DOST Undersecretary for Research and Development (R&D) Rowena Cristina l. Guevara nga iti pannakasursurat daytoy, saan pay a mapalubosan dagiti agtawen iti 17 ken naub-ubing a makipartisipar iti ania man a coronavirus disease (COVID-19) vaccine trials iti Filipinas gapu iti agduduma a rason.
Segun ken ni Guevara, adda dua a kangrunaan a rason a saan pay nga inraman ti Task Group on Vaccine Evaluation (TG VES) and Selection dagiti agtawen iti 17 ken naub-ubing kadagiti vaccine trials. Umuna, dagiti laeng agtawen iti 18 agingga iti 60 ti aw-awisen dagiti agar-aramid iti bakuna a makipartisipar kadagiti pannakaipadas ti bakuna (vaccine trials). Adda ngamin kadagiti nataengan ti umisu a kababagi a kasapulan iti pannakaamiris ti kinasamay ken kinatalged ti bakuna.
TURISMO: Intayon Idiay Ayuyang Garden iti Pila, Siudad ti Laoag!
Kuna pay ni Guevara a dagiti datos a maala iti pannakaipadas ti bakuna kadagiti nataengan a populasion ti maaramatto met iti pannakaamiris no ania ti umno ken natalged a dosis a para kadagiti ubbing.
Segun ken ni Guevara, dagiti laeng indibidual nga agtawen iti 18 ken natataeng ti makaipaay iti ethical ken legal a pammalubos para iti bukodda a pannakipartisipar kadagiti vaccine trials. Masapul ngarud ti pammalubos dagiti nagannak wenno legal nga agaywan (legal guardian) para kadagiti agtawen iti 17 ken naub-ubing.
Ti maikadua a rason, kas dinakamat ni Guevera, ad-adda a kayat dagiti eksperto a nasaysayaat a mapataud nga umuna ti nakappapati a datos a mangipakita iti kinatalged ken kinasamay ti bakuna kadagiti nataengan sakbay a maidiaya ti pannakaipadas ti bakuna kadagiti menor de edad.
Kuna daytoy nga adda dagiti ethical requirements ken datos iti kinatalged ken kinaepektibo a masapul a maidatag dagiti vaccine developers para iti panangarisit dagiti eksperto iti bakuna ken regulatory authorities.
Kinuna pay ni Guevara nga iti agdama, dagiti laeng pagilian a kas iti China, United Kingdom, United States, India, ken dadduma pay a pagilian ti mangiwaywayaten kadagiti vaccine trials kadagiti ubbing nga edad 17 ken naub-ubing.
Innayon ni Guevara a nasaysayaat no mangala nga umuna ti Filipinas kadagiti datos manipud kadagiti pagilian a mangipadpadas iti bakuna kadagiti ubbing para iti nataltalged ken naur-urnos a programatayo iti panagbakuna.
(Damag manipud iti Manila Bulletin.)
