Impakaammo ti Philippine Science High School (PSHS) System a mangrugin ti panagawatna kadagiti aplikasion para kadagiti Grado 8 ken 9 a transferees para iti School Year (SY) 2021-2022 iti daytoy Martes, Hunio 15.
Iti paskil iti Facebook post, impakaammo ti PSHS nga agawat kadagiti aplikasion agingga iti Hulio 30.
Nadakamat pay iti paskil a dagiti estudiante a nakaturpos kadagiti Grado 7 ken Grado 8 (iti babaen ti high school curriculum wenno ti baro a K-12 curriculum) iti ruar ti PSHS System, mabalin a maawat iti PSHS, no la ketdi ta matungpalda dagiti sumaganad a rekisito: makipagili (citizen) a Filipino nga awanan iti agdama nga aplikasionna a kas imigrante iti uray ania a ganggannaet a pagilian; karaman isuna iti lima a porsiento iti klasena nga adda iti ngato wenno masapul nga addaan iti grado a 85 a porsiento wenno nangatngato kadagiti amin a subject; masapul nga addaan iti character rating a di nababbaba ngem Very Satisfactory (VS) wenno katukadna; ken masapul a makapasa iti qualifying examination iti tunggal sumaganad a tallo a subject: Mathematics, Science, ken Communication Arts (English).
Nadakamat pay iti paskil a nayiskediul ti PSHS-Lateral Admission Qualifying Exam (LAQE) iti Agosto 24, 2021.
TURISMO: Intayon Idiay Ayuyang Garden iti Pila, Siudad ti Laoag!
Kiddawen ti PSHS System kadagiti aplikante nga idatagda dagiti sumaganad a rekisito iti di naladladaw ngem iti Hulio 30, 2021 iti kaasitgan a PSHS Campus:
-nakompleto a pormulario ti aplikasion a nakairamanan ti sertipikasion manipud kadagiti nagannak nga awan ti agdama nga aplikasion kas imigrante iti uray ania a ganggannet a pagilian;
-sertipikasion manipud iti agdama a nakaenrolan nga eskuelaan, mainaig kadagiti academic grades ken character rating (karaman kadagiti pormulario ti aplikasion);
- photocopy ti report card ti estudiante, sa maitugot ti original copy para iti pannakaberipikarna;
- dua a kaudian a 1×1 a ladawan; ken
*P300 a kas processing fee (saan a maisubli)
Gapu iti agtultuloy a pangta ti coronavirus disease (COVID-19), gutigoten ti PSHS dagiti aplikante nga i-download-da ti pormulario ti aplikasion (application form) iti https://www.pshs.edu.ph/ ken y-email ti nakompleto a pormulario ti aplikasion iti kampus a pagaplayanda.
Mabalin met nga idatag dagiti aplikante ti hard copy ti pormulario ti aplikasion iti campus registrar sa bayadanda ti processing fee iti campus cashier.
Iti paskil, nadakamat pay a saanen a mangyisyu ti PSHS iti LAQE test permit gapu ta online met ti eksamen. Y-emal ti Admissions Office ken/wenno ti campus registrar kadagiti aplikante dagiti detalye ti LAQE tapno maakses ti online exam.
Naiwayat ti LAQE idi 2020 babaen ti synchronous online test.
Tapno maliklikan ti panagwaras ti saan nga umno nga impormasion, imbalakad ti PSHS iti publiko nga alaenda laeng ti impormasion manipud iti PSHS System Office of Admissions babaen ti numero daytoy iti landline: (02) 89397747, ti opisial nga adres iti email: [email protected], ti website ti PSHS System iti http://www.pshs.edu.ph/, ken Facebook Page iti https://www.facebook.com/Philippine.Science.High.School.System.
(Damag manipud iti Manila Bulletin.)
