Maysa a mannursuro manipud iti Cordillera ti nairaman kadagiti napadayawan itoy a tawen a kas Princess Maha Chakri Awardee.
Maysa nga international award, maipapaay ti Princess Maha Chakri Award iti maminsan iti kada dua a tawen a mangbigbig kadagiti naisangsangayan a mannursuro manipud kadagiti 10 a pagilian a kameng ti Association of Southeast Nations (ASEAN) karaman ti Timor Leste, a nakaipaay iti naidumduma a pagimbagan iti biag dagiti estudiante.
Impakaammo ti Department of Education (DepEd) itay Hunio 13 a nagun-od ni Marcelo T. Otinguey, agpapaay a Head Teacher V iti Governor Bado Dangwa Agro-Industrial School iti Benguet.
Babaen ti paskil iti Facebook, kinablaawan ti DepEd ni Sir Marcelo T. Otinguey ti SDO (Schools Division Office) Benguet, Cordillera Administrative Region a kas maysa a 2021 Princess Maha Chakri Awardee.
TURISMO: Intayon Idiay Ayuyang Garden iti Pila, Siudad ti Laoag!
Dinakamat ti Princess Maha Chakri Award (PMCA) Foundation ni Otinguey a kas maysa kadagiti naisangsangayan a mannursuro manipud iti Association of Southeast Asian Nations (ASEAN) ken Timor Leste gapu iti dedikasion ken balligi iti internasional nga agpang a nakaipaay iti napateg a pagimbagan iti biag dagiti estudiante ken iti nasaysayaat a sistema ti edukasion.
Addaan ni Otinguey iti Bachelor of Secondary Education (BSEd) degree manipud iti Benguet State University ken iti Master’s degree iti Education-General manipud iti Baguio Central University.
Dinakamat pay ti PMCA Foundation a nakagun-od ni Otinguey iti Certification of Recognition a kas School Brigada Eskwela Coordinator iti DepEd Cordillera, ken iti Certificate of Appreciation manipud iti Southeast Asian Ministers of Education Organization (SEAMEO) iti bideo a naparnuay para iti Massive Open Online Course (MOOC) Teach On: Keeping the Passion Alive.
Manipud 2015, iti pannakitinnulong ti Ministry of Education manipud iti ASEAN ken Timor Leste, pilien ti ti PMCA Foundation iti maminsan iti kada dua a tawen ti maysa a naisangsangayan a mannursuro a napudno iti trabahona ken nagbanag iti napateg a pagimbagan iti biag dagiti estudiante.
Itoy a tawen, nairaman kadagiti PMCA awardees da Pengiran Haji Mohd Wahab bin Pengiran Haji Abdullah ti Brunei, Norn Dary ti Cambodia, Khoiriah, M.Pd. ti Indonesia, Sengphet Khounpasert ti Laos, Kyaw Zin Aung ti Myanmar, Norhailmi Abdul Mutalib ti Malaysia, Yok Joon Meng ti Singapore, HA Anh Phuong ti Vietnam, Pratin Leanchumroon ti Thailand, ken Vicente Marcal da Silva ti Timor Leste.
Nabangon ti PMCA iti okasion ti maika-60 nga anibersario ti kasangay ni Princess Maha Chakri Sirindhorn ti Thailand idi 2015.
Pammigbig daytoy a pammadayaw iti nasao a Thai princess kadagiti naisangsangayan ti gapuananna iti tay-ak ti edukasion ken iti pannakapadur-as ti kalidad ti biag, nangruna dagiti agkamtud iti biag. Malaksid iti panangipaay iti pammadayaw kadagiti napudno a mannursuro a nakaipaay kadagiti napateg a kontribusion iti edukasion ken pannakapadur-as ti biag ti tao, panggep pay ti PMCA a tulongan ken itandudo ti pannakapadur-as ti propesion a panagisuro, kasta metten ti pannakapasayaat ti edukasion ken pannakapapigsa ti internasional a panagkakanaig iti tay-ak ti edukasion.
(Damag manipud iti Manila Bulletin.)
