Impangabak ni Ronelyn B. Ramones, maysa a Registered Midwife a tubo ti Brgy. 40, Sitio 2, Buyon, Bacarra, Ilocos Norte, ti saritana nga “Iti Maysa a Nalamiis a Malem” iti Umuna Gunggona iti Pasalip AlVIYA iti Sarita 2021.
Maysa a premiado a mannurat, kangrunaan a nangabakan ni Ramones ti Carlos Palanca Memorial Awards for Literature babaen dagiti saritana nga “Anastasia” ken “Gapu ken ni Angelica” a nangyalat iti Umuna ken Maikadua a Gunggona, kas panagsaganadda
Inyalat met ni Rolando A. Seguro, Jr. ti Bulo, Allacapan, Cagayan ti Maikadua a Gungona babaen ti saritana a “Ti Caretaker.” Sigud nga empleado ti banko, mangisursuro ita iti Matucay National High School, Senior High School Department, iti babaen ti Accountancy, Business, and Management (ABM) Strand.
Ni met Dionisio S. Bulong, tubo ti Simbaluca, Sta. Teresita, Cagayan, ti nangabak iti Maikatlo a Gunggona babaen ti saritana a “Bespren Empong.” Dati nga Editor-in-Chief ti Bannawag, maysa kadagiti malaglagip a nobelana ti “Fighting Pogi.”
Tallo met dagiti napili a pakaipaayan ti Pangliwliwa a Gunggona, da Prodie Gar. Padios, Jefferson Apolonio, ken Efren Inocencio.
Impangabak ni Prodie Gar. Padios, dati a Literary Editor ti Bannawag ken tubo ti Sta. Teresita, Cagayan, ti saritana nga “An-annong ti Alipugpog.” Agtrabaho ita ni PGP iti Red Deer Advocate, aginaldaw a pagiwarnak iti Central Alberta, iti babaen ti Black Press Group of Publications, Ltd. Agnaedda a sangapamilia iti Red Deer, Alberta, Canada.
Awaten met ni Jefferson A. Apolonio ti maysa pay a Pangliwliwa a Gunggona babaen ti saritana nga “Iliw iti Nagtaudan a Daga.” Tubo ti Cabaroan Daya, Vigan, Ilocos Sur ngem agnaeden ken ti pamiliana iti Gaithersburg, Maryland
Pinangabak met ni Efren A. Inocencio ti Siudad ti Batac (Ilocos Norte) ti saritana a “Maestro Perfecto Ortograpia.” Nagretiro a Master Teacher 2, nagserbi iti Mariano Marcos Memorial Elementary School ken iti Quiling Elementary School, agpada nga eskuela iti Siudad ti Batac.
Dagiti hurado: Cles B. Rambaud, agdama nga Editor ti Bannawag (pangulo); Linda Lingbaoan-Bulong ti UP Press, kameng; ken Junley Lorenzana Lazaga, propesor ti Literatura iti UP Baguio (kameng).
Mayawatto kadagiti nangabak a mannurat ti cash prize ken sertipiko a kas gunggonada inton Agosto 14, 2021 iti pagtaengan ni Alex V. Yadao iti Libertad, Abulug, Cagayan.
Tinawen nga isaysayangkat ni Apo Yadao, agnaeden iti Amerika, ti Pasalip ALVIYA iti Sarita babaen ti panangimaton ni Dr. Freddie Padua Masuli, maysa a propesor iti Cagayan State University.
