PINILI, ILOCOS NORTE – Ipagpannakkel daytoy nga ili ti kaadda dagiti umilina nga agtawen iti 100 ken nasursurok pay a mangipakita nga ammo met dagiti umilina a saluadan ti salun-atda ken mangipaneknek pay iti kinadungngo dagiti annak a mangtartaripato kadakuada.
Iti listaan dagiti senior citizen nga adda iti ikut ti Municipal Social Welfare Development (MSWD) nga imatonan ni Decie Bumanglag Tugas, mabigbig ni Lila Casemira Agarano Pagdilao ti Brgy. Pagdilao a kabaketan. Rinambakan ni Lila Casemira ti maika-105 a panagkasangayna idi Abril 16 itoy a tawen.
Maymaysa ti anakna, ni dati a midwife ti Pinili Nenita Pagdilao. Ngem kas nadungngo nga ina, saan laeng a ti anakna ti inay-aywananna. Kas kinuna ni Dr. Lorielynda Pagdilao Oasay, agdama a dentista ti ili, nairaman met kadagiti nakaipaayan ti ayat ni Lila Casemira.
Kas kinuna dagiti kameng ti pamiliana, napigsa pay laeng ni Lila Casemira. Paboritona a lutuen idi ti pinakbet ken aba. Masansan a banga kano ti usarenna. Permi kano a kumbet dagiti nateng no agpakbet idi. Nagbalin a kapena ti kinirog a bagas.
TURISMO: Intayon Idiay Ayuyang Garden iti Pila, Siudad ti Laoag!
Iti agdama, nalaing pay laeng a kumansion para kadagiti appokona. Ken uray nakaiddan iti katre, irengrengna latta ti panagpa-manicure ken panagpakulotna.
Mabigbig met ni Lilo Timoteo Dadoy Abrogena ti Brgy. Puritac a kalakayan iti daytoy nga ili. Iti daytoy Hunio 16, 2021, rambakannan ti maika-104 a panagkasangayna.
Napigsa pay ken nalawag ti panagdengngegna; ti laeng pannakapukaw ti lawag dagiti matana ti agalenna. Kas mannalon, naritur ti bagina iti likudan ti witiwit. Nupay kasta, kunana a, “Saan met nga igubet lattan ti bagi iti trabaho; ikkan met iti inana.” Innayonna: “Ken dimo liplipatan ti agkararag iti Apo.”
Nagaget nga agmulmula iti nateng idi kapigpigsaanna; kunana nga awan kas iti nateng a sida.
Pito ti bungada iti daydi kaingungotna (dati a Guarina Quirapas) a kaaduanna kadakuada ti propesional: Alejandro (Manila); Elpidio, dati a kameng ti Army ken agdama a Punong Barangay iti barangayda; Pedro, maysa a mannalon; Anita (Florida, USA), Lolita (Manila), ken da Milagros ken Marilyn (agpada nga adda iti Italia). (AILEEN R. RAMBAUD)
