Maangay inton maikatlo a lawas ti Agosto ti Dap-ayan 2021 wenno ti tinawen a kombension ken literary-seminar ti GUMIL Filipinas (Gunglo Dagiti Mannurat nga Ilokano iti Filipinas ken iti Ballasiw-Taaw).

Daytoy ti napagnunumuan dagiti kameng ti Hunta Direktiba ti GF iti kaudian a Regular Meeting ti Hunta babaen ti virtual teleconferencing wenno Zoom meeting idi Marso 14, 2021.

Gapu iti kasasaad ti pagilian iti panawen ti pandemia (COVID-19), birtual met laeng daytoy a kas iti pannakaisayangkat ti napalabas a Dap-ayan. Mangbukel ti GF iti secretariat nga agpaay a host iti online a panagtataripnong dagiti mannurat.

Naangay idi Disiembre ti Dap-ayan 2020 wenno naisanud manipud iti Abril a kadawyan a pannakaisayangkatna gapu iti pandemia. Saan met a mabalin a maangay daytoy Dap-ayan 2021 iti Abril 2021 gapu ta kasapulan daytoy ti napapaut a panagsagana, kas kinuna ni Remy N. Albano, presidente ti GF.

Gapu met iti daytoy, napagnunumuan ti Hunta nga imbes a maangay ti Dap-ayan 2021 iti Abril a Bulan ti Literatura Dagiti Ilokano a kas iti nakaisigudan, maangay daytoy a kas paset ti selebrasion ti Buwan ng Wika.

Mairaman kadagiti aktibidad iti Dap-ayan 2021 ti serye dagiti webinar iti panagsurat, pannakayalnag dagiti naipablaak a libro iti daytoy a tawen, ken pannakapadayaw dagiti nangabak kadagiti nadumaduma a salip iti panagsurat iti Ilokano. (NMEValdez)