Pinasangbay ti Ilocos Norte ti 151 a Filipino iti eroplano a naggapu iti Kuala Lumpur babaen ti panagtitinnulong ti Metro Ilocos Norte Council (MINC), Laoag International Airport (LIA), ken ti Overseas Workers Welfare Administration (OWWA).
Kadagupan dagiti 151 a pasahero ti eroplano a nagdisso iti LIA idi Hunio 12, 128 kadagitoy ti Overseas Filipino Workers (OFWs), 18 ti saan nga OFW, ken 5 ti babassit pay nga ubbing. Kaaduanna met kadagiti pasahero ti tubo kadagiti sabsabali a lugar.
Kinuna ni Atty. Nikki Pilar, MINC Administratve Officer, a kasapulan a makuarantina dagiti pasahero iti uneg ti 10 nga aldaw sa iti maikapito nga aldaw ti pannakakuarantinada, aglasatda iti swab test ken mapalubosandanto a rummuar iti maika-10 nga aldaw no negatibo ti resulta ti nasao a panagamiris.
Kalpasan ti pannakakuarantina dagiti pasahero, mabalinen dagiti agnaed iti ruar ti Ilocos Norte ti aglugan iti sabali nga eroplano a mapan iti Manila wenno aglugan iti bus ti OWWA agingga kadagiti naituding a pagdissaaganda.
Manipud Kadagiti Agdama a Kameng ti Bannawag: Dios ti Agngina!
Ti nasao a rehional a biahe ti kakaisuna pay laeng a biahe nga inaprobaran ti Gobierno Probinsial ti Ilocos Norte agingga iti agdama, kas kinuna ni Atty. Pilar.
Innayon ni Atty. Pilar a mabalin nga agpasanglad ti LIA kadagiti ad-adu pay nga international flights iti masakbayan kalpasan ti naballigi nga umuna a rehional a biahe manipud iti Kuala Lumpur.
Mainaig itoy, kiniddaw ti Gobierno Probinsial ti Ilocos Norte ti panangpasayaat koma ti Department of Transportation kadagiti pasilidad ti LIA tapno maakomodar dagiti daddadakkel nga eroplano ken dagiti aggapu kadagiti ad-adayo a lugar a kas iti Estado ti Hawaii. (BLESSING ANGEL V. AGLIAM, PGIN-CMO)
