Imbes a mangilatang iti alawans para iti load, ipaay daytoy a munisipalidad iti Ilocos Norte ti libre a koneksion iti internet saan laeng a para kadagiti estudiante ken mannursuro no di pay ket kadagiti amin nga umilina.
Impakaammo ni Mayor Eddie Guillen ti Piddig, Ilocos Norte dagiti planoda a mangikonektar iti libre nga internet kadagiti amin nga eskuelan ken barangay ti ili uray pay kadagiti kasusulinekan a purok.
Kuna ni Guillen a nangilatang ti gobierno munisipal iti mapan a 16-milion a pisos para iti tallo a tawen a proyekto a marugian iti daytoy a tawen. Maala ti pondo manipud iti percent development fund ti gobierno ti Piddig.
Kuna ni Guillen nga imbes a mangitedda iti 100 a pisos nga alawans a pag-load dagiti estudiante iti linawas, mangisaadda laengen iti internet a mabenepisiaran pay amin nga umili.
Manipud Kadagiti Agdama a Kameng ti Bannawag: Dios ti Agngina!
Sakupen ti programa a libre nga internet ti sibubukel nga ili ti Piddig nga agkalikagum a mangpakonektar kadagiti eskuelana iti primaria ken sekundaria nga awanan iti koneksion iti internet.
Babaen ti fiber connection system tapno masierto ti naparpartak ken nataltalged nga internet, panggep pay ti proyekto ti mangipaay iti koneksion kadagiti residente nga interesado iti e-commerce.
Dinakamat ni Guillen a maisasaaden ti point-to-point internet connection kadagiti barangay hall ken eskuela ti Piddig.
Kalpasan ti tallo a tawen a kontrata, maibaba ti amortisasion iti tinawen manipud iti 6-milion a pisos, agbalinen a 250-ribu a pisos.
Kuna ni Guillen a makainut ti munisipio bayat ti panagbaybayag ti proyekto.
Iti pannakaipaskil daytoy, maisasaaden ti torre ti wireless internet service provider iti pasdek ti municipal hall a pangalaan met iti power dagiti babbabasssit nga antenna receivers a naisaad kadagiti opisina ti gobierno ken para publiko a lugar.
(Damag manipud iti Philippine News Agency ken Manila Bulletin.)
