Maysa nga ababa a pelikula (short film) manipud iti Ilokos ti napadayawan a kas kampeon iti maysa nga international film festival itay Mayo.

Impangabak ni Mark Lucas Moneda, maysa a filmmaker ken rehistrado a Radiologic Technologist manipud iti Siudad ti Laoag, ti indirihena nga ababa a pelikula a “Miss You, George!” iti “Best Short Film” iti International Film Festival Manhattan Spring 2021 (IFFMS).

Sakbayna, inyalat ni Moneda ti championship award for best short film iti QCinema International Film Festival itay napan a tawen.

Agwerret ti istoria ti “Miss You, George!” iti biag ti maysa nga agtutubo a lalaki a di makaruar iti balayda gapu iti naipaulog nga Enhanced Community Quarantine gapu iti pandemia a COVID-19. Babaen ti video call, makasarsaritana ketdi ti maysa a gayyemna a frontline health worker nga adda iti adayo a lugar. Ti panagpada ti taray ti biagda ti namagsinggalut kadakuada. Tamingen met daytoy a pelikula ti biag dagiti medical frontliners iti panawen ti pandemia.

Inyalat pay ti “Miss You, George!” ti “Jury Awards Best Short Film” ken ti “Audience Choice Award,” malaksid a nainominar para iti “Best Actor,” “Best Director,” ken “Best Performance of the Festival” iti babaen ti kategoria ti short film.

Ti pay “Miss You, George!” ti opisial a napili nga entry para iti 2021 Health For All Film Fest ti World Health Organization a naangay iti Switzerland itay napan a bulan a nangibagianna iti Filipinas iti babaen ti health emergencies category.

“Idi pay agtawenak iti 11 nga agsursurat ken agar-aramidak iti ababa a pelikula. Naayat dagiti dadakkelko kadagiti pelikula—ket siguro, naimpluensiaanak kadakuada malaksid ken ni Direk Emmanuel “Maning” Borlaza (direktor ti “Dyesebel,” dagiti pelikula a “Darna,” “Bituing Walang Ningning”, kdp.) a tubo ti Laguna ken kabagian ni tatangko,” kinuna ni Moneda.

Makiparpartisipar ni Moneda kadagiti nadumaduma a salip nga isaysayangkat ti Gobierno Probinsial ti Ilocos Norte, agraman iti napalabas a “Tan-ok Film Festival.” Isu ti nangsurat iti entry nga, “Ang Mga Nawalang Pag-asa at Panlasa” a nag-1^st Runner-up iti Cinemalaya Philippine Independent Film Festival.

“Talaga nga asideg iti riknak daytoy nga aramid ken naibuboskon ti kagudua ti biagko iti daytoy nga ‘ayatko,’” kinuna ni Moneda. “Ubbog ti ragsakko daytoy ken arapaapko a pagbalinen ti tunggal imahinasion a realidad wenno kinapudno, ken mangsaksi no ania ti epektona iti agbuybuya, no kasano a sagidenna  ti kararuada, ken no kasano a baliwanna ti panagkitada iti biag. Maysa a pakaidayawan ti agbalin a paset ti personal a pannakapasayaat ti maysa a tao.”

Innayonna, “Kayatko met nga ibinglay kadagiti agtutubo, nangruna kadagiti agar-arapaap nga agbalin a filmmaker, a nasken koma a denggenda ti bukodda a timek ket bay-anda a siwawayawaya ti pusoda nga ‘agsao.’ Dida koma met idildilig ti bagida iti sabali a tao ken padur-asenda koma ti bagbagida babaen ti panagsursuroda kadagiti baro a bambanag. Kangrunaanna, dida koma liplipatan ni Apo Dios kadagiti amin nga ar-aramidenda.”

Agtultuloy ti panangit-ited ti Gobierno Probinsial ti Ilocos Norte iti gundaway kadagiti amin nga agdadamo ken propesional a filmmakers a mangpadur-asda iti arteda babaen dagiti nadumaduma a salip ken programa. (STEWART C. OCAMPO)