Tapno nasaysayud ti proseso ti panagparehistro ti botante, inyalnag ti Commission on Elections (Comelec) itay Hunio 15, Martes, ti mobile application a mabalin a maluktan ti uray ania nga smartphone uray no offline.
Kuna ni Commissioner Marlon Casquejo a nangbalabala iti proyekto, apagisu ti pannakayalnag ti mobile app gapu iti pannakalimitar ti iruruar dagiti umili gapu iti pandemia a coronavirus disease (COVID-19) ta smartphone laeng ti kasapulan ti maysa a tao tapno makompleto ti pormulario.
Kuna ni Casquejo a makainut daytoy iti panawen, bannog, ken kuarta a mausar koma iti ipapan iti computer shop tapno i-download ken yimprenta ti pormulario, wenno ipapan panangala iti pormulario iti Comelec iti lokalidad tapno manomano a makompleto.
Impakaammo pay ni Casquejo a maparnuay ti QR Code kalpasan ti panangkompleto iti pormulario. Masapul a mai-save ti QR Code iti smartphone sa kalpasanna, mapan iti opisina ti Comelec iti bukod a lugar tapno ma-scan ti QR Code ken maalaan iti biometrics.
TURISMO: Intayon Idiay Ayuyang Garden iti Pila, Siudad ti Laoag!
Kuna ti Comelec a mabalin a mai-download ti Mobile Registration Form App iti link a bit.ly/MobileFormApp.
Mabalin pay a mai-share nga offline manipud iti maysa nga Android smartphone a mapan iti sabali babaen ti SHAREit wenno ania pay a sabsabali nga application a pagibinglay iti file. Apaman a may-install, mabalinen nga agaplay ti indibidual iti voter registration a saanen a masapul ti koneksion iti internet.
Tapno mausar ti Mobile Registration Form App, suroten dagiti sumaganad nga addang:
1. Luktan ti mobile app, sa iklik ti “Get Started.”
2. Pilien ti kayat a kita ti application sa iklik ti “Proceed.”
3. Ikabil dagiti amin a kasapulan a personal nga impormasion.
4. Kompirmaren ti personal nga impormasion babaen ti panangkatik iti checkbox.
5. Iklik ti “Generate QR Code” sa ti “Save” tapno mai-save daytoy iti gallery ti selponmo.
6. Mangitugot iti balido nga ID no mapan iti opisina ti COMELEC iti lugaryo para iti pannaka-scan ti QR Code.
Kuna ti Comelec a naipakat ti nasao a mobile app kadagiti napili a pamadasan a lugar iti apagtapog ti Hunio ken maipakpakat itan iti nasurok a 500 siudad ken ili iti entero a pagilian.
(Damdg manipud iti Manila Bulletin.)
