Mabalin nga inayonan manen ni gasat ti Gilas Pilipinas iti tartaraudi ti ay-ayam tapno magun-od ti manmano nga agsaruno a balligi kontra iti South Korea, 82-77, wenno panangatiwda iti amin nga innem nga ay-ayam (tallo itay napan a tawen) iti FIBA Asia Cup Qualifiers iti Angeles University Foundation Sports and Cultural Center iti Pampanga.
Immiskor ni Justine Baltazar iti di naguardiaan a 'dakdak' iti 31.7 a segundo laengen a nabatbati iti oras tapno maipaay iti Filipinas ti uppat a puntos nga abante iti iskor a 79-75 kalpasan a naigasatanna ti umisu a puesto idi kunam la no nakapuersa ti South Korea iti turnover bayat ti innagaw iti bola.
Maiduma ketdi daytoy dakdak ni Baltazar iti taraudi ti maikadua a panagsango dagitoy dua a team kalpasan nga inladawan ni Cho Sanghyun a coach ti South Korea a “lucky shot” ti tres SJ Belangel a nangabakan ti Filipinas iti umuna a panagsango dagitoy dua a team idi Mierkoles, Hunio 16.
Iti sumaruno a play, immiskor iti dua a puntos ni Ricardo Ratliffe, sigud nga import iti PBA ken agserserbi a naturalized player ti South Korea. Nakaala met ni Belangel iti unsportsmanlike foul kalpasanna ket naipastrekna ti maysa kadagiti dua a free throw idinto a naipastrek met ni Dwight Ramos ti dua kadagiti maudi nga uppat a free throw daytoy tapno masierto ti balligi.
TURISMO: Intayon Idiay Ayuyang Garden iti Pila, Siudad ti Laoag!
Nagsaruno nga inatiw daytoy grupo ni Coach Tab Baldwin ti team ti South Korea banag a saan a naaramid ti Filipinas manipud inyalatda ti 1985 ABC Championship, ti maudi a continental championship ti pagilian. Buklen ti Gilas dagiti nai-draft iti PBA a paset ti grupo ti Gilas ken dagiti nasisiglat a basketbolista iti kolehio a kaaduanna ti manipud iti Ateneo ken sumagmamano pay ti manipud kadagiti team iti UAAP.
Sakbay ti rugi ti Clark window ti FIBA Asia Cup Qualifiers, ti laeng kakaisuna a balligi ti Filipinas kontra iti South Korea kadagiti kangrunaan nga internasional a salisal kas iti torneo iti FIBA ken ti Asian Games manipud iti balligi iti ABC ket bayat ti dramatiko a balligi iti semifinal ti 2013 FIBA Asia Championship iti Mall of Asia Arena.
Lineppas ti Gilas ti continental qualifiers babaen ti panagnumero uno daytoy iti Group A ket nakasalidada a mapan kadagiti salisal iti FIBA Olympic Qualifying Tournament iti Belgrade, Serbia a pangsanguanda iti nasao a pagilian ken ti Dominican Republic para iti tiansa a makagteng iti semis.
Nakaiskediul pay kadagitoy nauubbing a basketbolista a Filipino ti mismo a salip iti FIBA Asia Cup a maangay iti Agosto 12 agingga iti 28 iti Jakarta, Indonesia.
(Damag manipud iti Manila Bulletin.)
