Mairaman ti Filipinas kadagiti pagilian a maibingayan iti kaudian a 55-milion a bakuna iti COVID-19 nga idonar ti gobierno ti Estados Unidos iti sangalubongan, kas impakaammo ti White House, ita a Martes, Hunio 22 (rabii ti Lunes iti Washington, D.C.).
Manamnama a makaawat ti Filipinas iti bingay manipud iti mapan a 16-milion a dosis ti bakuna a maibunong kadagiti pagilian iti Asia a pakairamanan ti India, Nepal, Bangladesh, Pakistan, Sri Lanka, Afghanistan, Maldives, Bhutan, Vietnam, Indonesia, Thailand, Malaysia, Laos, Papua New Guinea, Taiwan, Cambodia, ken ti Pacific Islands.
Iti pakaammo ti US Embassy iti Manila, maawat ti Filipinas ti kaudian a bansada ti bakuna babaen ti pasilidad ti COVAX ken direkta a donasion.
Daytoy kaudian a donasion ket nayon ti nailatang a para iti Filipinas iti babaen ti immuna nga inkari ni Presidente Biden idi Hunio 3 a panangidonar ti Estados Unidos iti sangalubongan iti 25-milion a bakuna.
Manipud Kadagiti Agdama a Kameng ti Bannawag: Dios ti Agngina!
Kinuna pay ti Administrasion ni Biden a makitinnulong ti Estados Unidos kadagiti agar-aramid iti bakuna tapno ad-adu pay a bakuna ti maiwaras iti sangalubongan. Sakbay ti yaatendarna iti G7 Summit iti Europa, impakaammo ni Presidente Biden a gumatang ti Estados Unidos iti 500-milion a dosis ti bakuna sa idonarda iti 92 a nakurapay ken medio nakurapay a pagilian ken kadagiti kameng iti African Union.
Iti pannakasursurat daytoy, nakaawaten ti Filipinas iti nasurok a 5-milion a bakuna babaen ti COVAX, pakairamanan ti bakuna a Pfizer BioNTech a parnuay ti Amerika.
Ti Estados Unidos ti kadakkelan a kontribiutor iti COVAX Advance Market Commitment, maysa a sangalubongan nga inisiatibo a mangsuportar iti patas a pannakaala iti bakuna iti COVID-19.
(Damag manipud iti Manila Bulletin.)
