NAPABARO:
Pimmusay ni dati a Presidente Benigno “Noynoy” Aquino III idi kalman, Huebes, Hunio 24, iti tawenna a 61.
Addan ag-agalenna a nadumaduma a sakit sipud pay idi 2019, naireport a nagsagaba iti sakit ti kidney ket nag-dialysis iti di nakurkurang ngem lima a bulan, malaksid iti naireport a kaadda ti kanserna iti bara. Sakbayna, naglasat iti operasion iti puso (angioplasty) ken naitaray iti Capitol Medical Center iti Quezon City, asideg iti pagtaengan ti pamilia Aquino, ken ditoyen a simmina.
Kinuna ni Pinky Aquino-Abellada, kabsat ti dati a presidente, a pimmusay ti dati a presidente bayat a matmaturog daytoy. Innayonna nga iti death certificate daytoy, nailanad a pimmusay iti alas 6:30 iti bigat ti Hunio 24 gapu iti "renal disease secondary to diabetes."
Nagpaay a presidente manipud 2010 agingga iti 2016, ni Noynoy (nasinged pay nga awagna kadagiti umili) ti maika-15 a presidente ti Filipinas.
Manipud Kadagiti Agdama a Kameng ti Bannawag: Dios ti Agngina!
(Nairaman ditoy ti report manipud iti Manila Bulletin.)
