Saan a marisut ti problema iti panagduadua dagiti umili nga agpabakuna babaen ti panangipangta a maarestarda no saanda nga agpabakuna kontra iti COVID-19.
Dayta ti kuna ni Senador Joel Villanueva iti maysa a pakaammo idi Martes, Hunio 22, iti dina yaanamong iti pangta ni Presidente Duterte a paarestarna dagiti umili a saan nga agpabakuna. Innayon ni Senador Villanueva a maguyugoy koma dagiti umili nga agpabakuna babaen ti edukasion.
Dinakamat ni Villanueva nga awan ti mapanunotna a panaglabsing a mabalin nga ipataw iti saan a mangayat nga agpabakuna. Innayonna pay a nalabit, mabalinton a pagsasaritaan ti panaglabsing no addan agsobsobra a bakuna para kadagiti umili. Iti agdama, adu dagiti mayat nga agpabakuna a saan pay a naipaayan iti gundaway a mabakunaan.
Iti met maysa a tweet ni Presidente ti Senado Vicente Sotto III a nakadakamatanna iti daytoy a pakaseknan, kinunana a no adda madi nga agpabakuna, ania a linteg ti nasalungasing?
TURISMO: Intayon Idiay Ayuyang Garden iti Pila, Siudad ti Laoag!
Apaman a makagatang ti gobierno iti umdas a bakuna para kadagiti umili, kuna ni Villanueva a mabalin a tuladen ti gobierno nasional dagiti lokal a yunit ti gobierno a mangididiaya kadagiti gunggona ken premio kadagiti agpabakuna, imbes a pannusa kadagiti saan nga agpabakuna.
Innayon ni Villanueva a no nakapanunot dagiti agkurkurang iti pondo a lokal a yunit ti gobierno kadagiti naidumduma a wagas tapno makaidiayada iti bakuna, naal-alibtak koma ti nasional a gobierno a mangidiaya iti bakuna yantangay ad-adu ti rekursos daytoy.
Iti maysa a bitla a naipabuya iti telebision idi Lunes, Hunio 21, kinuna ni Presidente Duterte a bilinenna dagiti lokal nga ehekutibo nga arestarenda dagiti madi nga agpabakuna tapno matengngel dagiti posible a nagimet iti bayrus a corona. Kuna ni Duterte nga agpili dagiti umili: agpabakuna wenno maibalud.
Kabayatanna, kuna ni Sekretario Harry Roque a pannakangiwat ti Presidente, kasapulan nga adda linteg para iti daytoy tapno maisayangkat.
Damag manipud iti Manila Bulletin.
