Nangyalnag ti Department of Tourism (DOT) iti Rehion ti Ilokos (Rehion 1) iti pass system a mangiwardas iti panagpasiar dagiti turista manipud kadagiti sabali a rehion kasta met nga agserbi daytoy a para iti contact tracing ken panagmonitor.

Iti maysa nga innuman itay nabiit, kuna ni DOT Ilocos Regional Director Joseph Francisco Ortega a daytoy tourist pass system nga adda iti region1.tarana.ph ket naparnuay a kas nagtitipon a sistema ti impormasion a pagrehistruan dagiti turista manipud iti ruar ti rehion.

Kuna ni Ortega a sabali daytoy a sistema kadagiti naistranded nga indibidual iti lokalidad ken dagiti overseas Filipino workers.

Innayonna nga apaman a makapagrehistro ti turista, masapul a may-upload dagiti rekisito sa aguray iti pannakaaprobar daytoy manipud iti local government unit ti panggep a papanan a lugar. 

Babaen ti sistema, ma-access dagiti turista dagiti listaan dagiti rekisito ti local government iti panggep a papanan a lugar, kasta met ti listaan dagiti akreditado ti DOT nga akomodasion, tour guide, hotel, restauran, ken itinerario.

Innayon ni Ortega a dagiti probinsia ti La Union, Ilocos Norte, ken Ilocos Sur, masapul nga ag-book dagiti turista kadagiti travel and tour operators tapno mamonitor ti panaggunay dagiti turista kadagiti lokalidadda gapu ta agraraira pay laeng ti pandemia a coronavirus disease 2019 (COVID-19).

Nupay kasta, saan pay laeng nga agawat ti Rehion 1 kadagiti biahe para iti panagpalpaliwa manipud kadagiti siudad iti National Capital Region ken probinsia a Cavite, Laguna, ken Rizal.

Naipablaak iti Bannawag iti Hunio 16-30, 2021 a bilang.