SIUDAD TI SAN FERNANDO, La Union – No nasken a mapanka iti La Union ken kompleton ti bakunam, mabalinmon ti mapan iti nasao a probinsia. Daytoy kompleto a bakuna ti sukat ti negatibo a resulta ti reverse transcription-polymerase chain reaction (RT-PCR) test.
Kinuna ni Adamor Dagang, provincial information officer ti La Union, a maipakat daytoy kadagiti tattao a nakompleton ti bakunada kontra iti COVID-19, dua a lawas sakbay ti ipapanda iti La Union.
Dinakamat ni Dagang a maibatay iti palawag dagiti eksperto iti salun-at, addaanen ti bagi iti imunidad dua a lawas kalpasan ti maikadua a dosis ti bakuna. Impaganetget ketdi ni Dagang a dagiti laeng mapalubosan a mapan iti La Union, isu dagitay adda importante nga aramidenda, saan ketdi a tapno umayda laeng agpasiar wenno kas turista.
Nailanad iti Executive Order (EO) No. 29 nga impaulog ni Gob. Francisco Emmanuel Ortega III idi Hunio 17 a dagiti bakuna a naipaay iti nasao a tao, masapul a nairaman iti listaan ti Philippine Food and Drug Administration (FDA) Emergency Use Authorization (EUA) wenno iti babaen ti Compassionate Special Permit (CSP).
TURISMO: Intayon Idiay Ayuyang Garden iti Pila, Siudad ti Laoag!
Masapul met nga itugot ti tao ti vaccination card daytoy a maberipikar kadagiti beddeng (boundary) sakbay a sumrek iti probinsia. Maipakita ti vaccination card a kas sukat ti negatibo nga RT-PCR.
Kadagiti met tattao a maysa a dosis pay laeng ti naalada a bakuna, masapul a mangiparangda iti negatibo a resulta ti RT-PCR a naala iti di nabaybayag ngem 72 oras sakbay ti iseserrek iti probinsia.
Kabayatanna, kuna ni Dagang nga amin a turista a sumrek iti probinsia, kompleto man wenno saan ti bakunada, masapul a mangiparangda iti negatibo a resulta ti RT-PCR a naala iti saan a nabaybayag ngem 72 oras sakbay a mapalubosanda a sumrek iti probinsia.
Innayonna a dagiti overseas Filipino workers (OFWs), ania man ti panggepda iti iseserrekda iti La Union, mapalubosanda a sumrek no mangipakitada iti vaccination card.
No saan pay a kompleto ti dosis ti maysa nga OFW, masapul a mangipakita iti sertipikasion manipud iti Bureau of Quarantine a nakompleto daytoy ti pito nga aldaw a kuarantina; a ti bakuna a naipaay iti daytoy nga OFW ket nairaman iti listaan ti Philippine Food and Drug Administration EUA wenno iti babaen ti Compassionate Special Permit (CSP).
Innayon ni Dagang nga asino man nga indibidual wenno ania man ti panggepna iti iseserrekna iti probinsia, masapul nga agparehistro iti NAPANAM ken mangipakita iti balido nga identification card (ID).
Ti NAPANAM ket isu ti COVID-19 tracking system ti Probinsia ti La Union a pakaaramatan ti QR code a pangammo kadagiti lugar a binisita ti maysa a tao ken pakaammuan no asino dagiti nakalangenlangenna a tattao bayat ti kaaddana iti La Union.
(Damag manipud iti Philippine News Agency ken Manila Bulletin)
