Ni ARGYLL CYRUS GEDUCOS
NAALARMA ti Malakanyang iti report ti World Bank a mangipakita a 80 a porsiento kadagiti estudiante a Filipino ti agkurang ti ammoda iti rumbeng koma nga ammoda, kas maibatay iti agdama a tukad wenno grade level a yanda.
Kinuna ni Presidential Spokesman Harry Roque a maibatay iti report, maysa iti tunggal 4 nga estudiante iti Grado 5 ti addaan iti laing iti Math ken iti panagbasa (reading) a kas iti laing nga adda iti maikadua ken maikatlo a grado.
Iti isu met laeng a report, naammuan nga uppat iti kada lima nga agtawen-iti-15 nga estudiante ti di pay makaammo kadagiti konsepto iti matematika a kas iti decimal ken fraction a rumbeng koma a naipaulodan idi addada iti maikalima a grado iti elementaria.
Iti pannakiumanna kaagiti agiwarwarnak (Huebes, Hulio 1), kinuna ni Roque a makapadanag ti linaon ti nasao a report. Kas kunana, “This is very disturbing po and very alarming.”
Manipud Kadagiti Agdama a Kameng ti Bannawag: Dios ti Agngina!
Nupay kasta, kinuna ni Roque nga aramiden ti Departamento ti Edukasion (DepEd) ti amin tapno marisut daytoy a problema.
Innayonna a sipud nag-lockdown ti pagilian gapu iti COVID-19, nangiwayat ti DepEd kadagiti baro a panglakagan tapno maidanonna laeng ti edukasion kadagiti ubbing nga agad-adal.
“We are on blended learning po. We utilize modules, TV, radio, as well as computer-aided forms of educational material,” kinuna ni Roque.
Nupay kasta, kuna ti report ti World Bank a ti parikut, nangrugi pay sakbay ti pandemia.
Kuna ti report nga addan krisis iti edukasion ti Filipinas sakbay ti COVID-19 ngem mabalin a pinakaro ti COVID-19.
(Damag manipud iti Manila Bulletin.)
