CURRIMAO, Ilocos Norte – Manamnama a maparegta ti industria ti turismo ti Ilocos Norte apaman a maluktan manen para kadagiti internasional a cruise ship ti baro a napasayaat a pantalan ti Currimao.
Kuna ni Xavier Ruiz, provincial tourism operations officer, nga iti kanito a makontrol ti panagwaras ti coronavirus disease 2019 (COVID-19), maparegta ti cruise industry a tumulong met a mangparegta iti sektor ti turismo manipud iti nakaro nga epekto ti pandemia.
Kuna ni Ruiz a sakbay ti pandemia, nagbalin ti pantalan ti Currimao a nalatak a baro a pantalan a para iti cruise industry.
Iti maysa nga innuman, kinuna ni Ruiz a maysa kadagiti kadakkelan nga industria iti Ilocos Norte ti sektor ti turismo. Mapan a 10,000 a katao ti agtrabtrabaho iti daytoy no agtipon ti direkta ken indirekta a trabaho. Daytoy ti gapuna a dakkel ti pukaw ti industria ti turismo ti pannakaiserra ti pantalan.
Manipud Kadagiti Agdama a Kameng ti Bannawag: Dios ti Agngina!
Innayon ni Ruiz a maipakpakat latta ti Executive Order No. 52-20 a pinirmaan ni Governor Matthew Joseph Manotoc itay napan a tawen. Panggep ti EO No. 52-20 a pengdan ti panagwaras ti COVID-19 iti probinsia.
Iti pannakaisursurat daytoy, makastrek laeng dagiti bisita iti Ilocos Norte babaen ti biahe iti takdang ken iti tangatang babaen ti Laoag International Airport.
Inrugi ti Department of Transportation (DOTr) ken ti Philippine Ports Authority (PPA) ti panangikalawa iti nasao a pantalan idi 2017 ken nakompleto idi Agosto 2019.
Iti laksid ti pandemia, kinuna ni Ruiz nga adda latta dagiti maisaysayangkat a proyekto a pannakapasayaat dagiti kalsada tapno mapasayud ti iseserrek iti pantalan ken ti pannakapasayaat metten ti terminal iti pantalan a para kadagiti pasahero.
(Damag manipud iti Manila Bulletin.)
