Ni GENALYN KABILING
Ipakat ti gobierno ti maymaysa a ragup dagiti health protocols a para kadagiti agsangpet a biahero manipud kadagiti sabali a pagilian kadagiti amin a sumrekan iti pagilian.
Kinuna ni Presidential Spokesman Harry Roque, nangyetnag ni Presidente Duterte iti “pinal a desision” maipapan kadagiti agpapada a protokol a para kadagiti agsangpet a pasahero, agraman dagiti pagalagadan maipapan iti kuarantina ken panag-test, tapno maliklikan ti panagwaras ti Delta variant ti COVID-19.
Immun-unan a nangipatungpal ti Cebu iti bukodna nga annuroten iti panagpa-swab test apaman a makasangpet (swab-upon-arrival) dagiti agawid a Filipino ken mapalubosanda nga agtuloy iti papananda dagiti negatibo ti resultana. Maisupadi daytoy kadagiti pagalagadan nga impakat ti gobierno nasional. Pinalagipanen ti task force ti gobierno para iti pandemia ti probinsia ti Cebu nga agtungpal kadagiti nailian a protokol a para kadagiti biahero nga agsangpet manipud iti ballasiw-taaw
Kinuna ni Presidente Duterte a saan a mabalin a mailaksid ti Cebu manipud kadagiti reglamento iti salun-at nga ipatpatungpal ti Inter-Agency Task Force for the Management of Infectious Diseases (IATF). Dinawat ni Duterte ti Department of Interior and Local Government (DILG) a makiuman ken ni Garcia, ta kinunana nga adda dagiti linteg a masapul a tungpalen daytoy, kalpasan nga impapilit ti probinsia nga ipatungpalna dagiti bukodna a protokol a para kadagiti agsangpet iti nasao a probinsia.
Manipud Kadagiti Agdama a Kameng ti Bannawag: Dios ti Agngina!
Dinakamat ti Presidente nga iti panagsaritada ken Garcia, kinunana a rumbeng a patas ti pannakaipatungpal dagiti pagalagadan ket nupay adda met rason ti sursurotenda nga annuroten, saan a mayayon daytoy iti annuroten ti gobierno nasional ken iti kuna dagiti doktor iti medisina.
Segun kadagiti pagalagadan ti IATF, amin nga agsangpet a pasahero, masapul nga agdalan iti 14-aldaw a kuarantina apaman a sumangpet. Iti umuna a 10 aldaw, masapul nga agtalinaedda iti akreditado a pasilidad ti kuarantina, idinto a kadagiti nabatbati nga aldaw, makompleto ti kuarantina iti pagtaengan. Aglasat dagitoy iti polymerase chain reaction test iti maikapito nga aldaw ti pannakakuarantina dagitoy.
Iti sabali a bangir, dagiti pasahero a nabakunaan iti pagilian ken dagiti nabakunaan iti ballasiw-taaw wenno iti pagilian ken teritorio a nagtalinaed iti “berde” wenno nababa ti risgona iti COVID, addaanda iti nabibiit a tiempo ti kuarantina a pito nga aldaw manipud isasangpetda. Ma-test dagitoy iti maikalima nga aldaw bayat ti kuarantina.
(Damag manipud iti Manila Bulletin.)
