Ni CHARISSA LUCI-ATIENZA
Panggep ti Department of Social Welfare and Development (DSWD) a makompleto ti manual a panagyawat kadagiti emerhensia a tulong a kuarta iti babaen ti Social Amelioration Program (SAP) sakbay nga agtapos ti Hulio.
Iti sabali a pannao, saanen a dagiti financial service providers (FSP) ti agited iti kuarta kadagiti benepisiario.
Iti pakaammo ti DSWD, dinakamat pay daytoy nga agingga iti Hulio 2, nasuroken a PHP89.8-bilion ti pategna a tulong a kuarta ti naiteden iti nasurok a 14.88-milion a nakurapay a pamilia iti babaen ti maikadua a bansada ti SAP.
Naisangrat daytoy agdama a pannakaiwarwaras ti SAP kadagiti adda iti waitlist ken kadagiti di pay nakaawat iti naisangrat kadakuada a SAP 2 manipud kadagiti financial service providers.
Manipud Kadagiti Agdama a Kameng ti Bannawag: Dios ti Agngina!
Idi Abril iti daytoy a tawen, insardeng ti DSWD ti serbisio dagiti innem nga FSPs ken inkeddengda nga iwayat ti manual a panagyawat kadagiti tulong kadagiti di pay a nakaawat a benepisiario.
Sakbayna, idi Hunio 30 itay napan a tawen, iti babaen ti memorandum of agreement a nakipinnirmaanda iti DSWD, timmulong ti Lank Bank of the Philippines, Robinsons Bank, Unionbank, RCBC, Gcash, Paymaya, ken Starpay iti pannakaited ti SAP 2 kadagiti benepisiario.
Dinakamat pay ti DSWD nga iti pannakaisursurat daytoy, nasurok a 17-milion a nakurapay a pamilia ti nakaawat iti umuna a bansada ti SAP nga aggatad iti nasurok a PHP98-bilion.
Iti babaen ti Republic Act No. 11469 wenno Bayanihan 1, mapan a 18-milion a nakurapay a pamilia ti kualipikado nga umawat iti emerhensia a tulong nga aggatad iti P5,000 agingga iti P8,000.
(Damag manipud iti Manila Bulletin.)
