Naipaay iti “Iyallatiw,” maysa nga ababa a pelikula nga Ilokano, ti Gerry Balasta Advocacy Award 2021 iti kallabes a maika-11 nga edision ti International Film Festival Manhattan ti New York.

Sinurat ken indirihe ni Melver Ritz L. Gomez ti Paoay, Ilocos Norte, indokumento ti “Iyallatiw” ti pannakayallatiw ti maysa nga agpukpukawen a tradision dagiti Ilokano kadagiti ubbing nga Ilokano.

Naaramat iti ag-18-a-minuto a pelikula ti lengguahe nga Ilokano iti dialogo ken naikkan iti English a subtitle. Nairuar met daytoy a pelikula iti babaen ti Ylocostar Films.

Kas kinuna ni Gomez, sinurat ken indirihena ti pelikula nga awan iti panunotna ti mangyalat iti ania man a pammadayaw ta ti panggepna laeng, isu ti mangidokumento iti maysa nga agpukpukawen a tradision, partikular iti ilina a Paoay, isu a bonus para kenkuana ken kadagiti amin a nakipaset iti pelikula ti panangbigbig dagiti nadumaduma nga award-giving bodies iti nasao a pelikula.

Naipanagan ti Gerry Balasta Advocacy Award a naipaay iti “Iyallatiw” ken ni Fil-Am Gerry Balasta ti New York, maysa a filmmaker ken co-founder ti IFFM, a natay gapu iti COVID-19.

Sakbayna, naipaay iti “Iyallatiw” ti Viddsee Juree Awards 2021 Silver Award. Ti Viddsee Juree Awards, a maang-angay iti tinawen, ti mangpadpadayaw kadagiti kapipintasan a short films manipud iti Indonesia, Filipinas, ken Singapore.

Iti daytoy met laeng a tawen, napili ti “Iyallatiw” a finalist iti Gawad Alternatibo CCC Para sa Pelikula iti babaen ti Documentary Category.

Mabigbig ni Gomez kadagiti pelikulana a mangitantandudo iti pannakasaluad ti kultura ken tradision dagiti Ilokano. Sakbay ti “Iyallatiw,” maysa pay kadagiti pelikulana a maipanggep met laeng kadagiti Ilokano ti napili a maisalip iti Roshani International Film Festival ti India ken nakabigbiganna a kas Best Foreign Director iti babaen ti short film category. Napili met laeng ti pelikula a maysa kadagiti naipabuya iti Pista ng Pelikulang Pilipino iti napalabas a tawen iti babaen ti Film Development Council of the Philippines ken ti Cinema Rehiyon ti National Committee on Cinema ti NCCA.

Mangisursuro ita iti Mariano Marcos State University ni Gomez, napadayawan a Sirib Awardee idi 2019 ti Gobierno Probinsial ti Ilocos Norte, iti babaen ti Ilocos Norte Youth Development Office.

Ti Production Team ti Ylocostar Films: Melver Ritz L. Gomez ti Paoay, I.N. (Writer ken Director), Koleen Ragudo ti Paoay, I.N. (Production Manager), Bryan Tamayo ti Marcos, I.N. (Behind the Scene Photographer), Royson Pascua ti Paoay, I.N. (Clapper), ken Marvyl Somera ti Badoc, I.N. (Cinematographer).

Dagiti nagakem iti “Iyallatiw”:

Nataengan (Kantores): Leonida Palino, Olivia Raqual, Assensia Garcia, Vivian Madarcos, Nena Daludado, Demetria Gallardo, Adela Cabuntocan, Consuelo Guinsatao, Liza Alegado, Nora Tabili, Brigida Valdez, ken Manuela Sadian.

Ubbing: Chrison Orcino, Jonas Tolentino, Mary Helen Orcino, Neil Elijah Torrate, Alexxa Rainne Bista, Czyrille Sophia Dimaya, Kristine Alexandrea Galdiano, Samantha Sadian, Jherielle Nadine Quidilla, Lars Nicole Sadumiano, Princess Sadumiano, Cristel Balanay, Carmela Guiansatao, Sheila Marie Piga, Sophia Anthonette Cenence, Wylene Piga, Marianne Saducos, ken Carolyn Tenerife. (CLES B. RAMBAUD)