Ni JALEEN RAMOS
Segun kadagiti eksperto, dagiti indibidual a saan pay a nabakunaan kontra iti COVID-19, saan laeng a ti bukodda a salun-at ti agpeggad no di pay ket agbalinda a posible a “paktoria dagiti baro a variant.”
Kinuna ni Dr. William Schaffner, maysa a propesor iti Division of Infectious Diseases iti Vanderbilt University Medical Center iti Tennessee, USA, a no kasano ti kaadu dagiti saan a nabakunaan nga indibidual, kasta met ti kaadu ti gundaway ti bayrus nga umadu pay.
Imballaag pay ni Schaffner a no adda gundaway ti bayrus nga umadu, adda ngarud met gundawayna nga agbaliw, nga iti daytoy a panagbaliw (mutation), ad-adda pay a kumaro wenno bumileg.
Iti biang met ni Andrew Pekosz, maysa a microbiologist ken immunologist iti Johns Hopkins Bloomberg School of Public Health iti Maryland, USA, a bayat ti panagbaliw (mutation) ti bayrus, no ania kadagiti variant ti makalasat, dagitoy met ti kapartakan nga agwaras kadagiti tattao.
TURISMO: Intayon Idiay Ayuyang Garden iti Pila, Siudad ti Laoag!
Addan sumagmamano a variant ti coronavirus a nagwaras iti sangalubongan. Mairaman kadagitoy ti B.1.1.7 wenno Alpha variant nga immuna a nakita iti England, ti B.1.351 wenno Beta variant nga immune a naduktalan iti South Africa, ken ti B.1.617.2 wenno Delta variant nga immuna a nakita iti India.
Immun-unan a dinakamat ti World Health Organization a no nakarkaro ti panagbaybay-a dagiti tao nga agwaras ti bayrus, ad-adda met nga adda gundaway daytoy nga agbaliw.
Iti United States, 18 nga estado pay laeng ti nakakompleto iti bakuna iti nasursurok ngem kagudua ti populasionna, segun iti rekord ti US Centers for Disease Control and Prevention.
Iti rekord iti Hunio 27, nakaikorden ti Filipinas iti 2,527,286 a Filipino a nabakunaan iti kompleto kontra iti bayrus.
(Damag manipud iti Manila Bulletin.)
