Ni ELLALYN DE VERA-RUIZ
Agingga itay napan a tawen (2020), agdagupen ti populasion ti Filipinas iti 109,035,343, kas maibasar iti Census of Population and Housing (2020 CPH) nga inwayat ti Philippine Statistics Authority (PSA).
Opisial nga impakaammo ni Presidente Rodrigo Duterte daytoy a bilang babaen ti Proclamation No. 1179 a naipaulog itay Hulio 6, 2021.
Kuna ti PSA a ti populasion ti pagilian, ibagianna ti dagup a bilang dagiti tattao a sibibiag iti di nalablabes ngem iti 12:01 ti parbangon ti Mayo 1, 2020 kadagiti 17 nga administratibo a rehion ti pagilian.
Mairaman ditoy dagiti Filipino kadagiti embahada, konsulada, ken mision iti ballasiw-taaw.
TURISMO: Intayon Idiay Ayuyang Garden iti Pila, Siudad ti Laoag!
Kuna ti PSA a dimmakkel ti populasion ti Filipinas iti 8,053,906 manipud iti 100,981,437 idi 2015, a kayatna a sawen, mapan a 1.63 a porsiento ti tinawen a population growth rate (PGR).
Madakamat a naparpartak ti panagdakkel ti populasion ti pagilian kadagiti tawen manipud 2010 agingga iti 2015 ta 1.72 porsiento ti PGR iti las-ud dagitoy a tawen.
Kadagiti 17 nga administratibo a rehion, ti Region IV-A wenno Calabarzon (Cavite, Laguna, Batangas, Rizal, Quezon) ti addaan iti kadakkelan a populasion iti 2020 iti bilangna a 16,195,042, a sinaruno ti National Capital Region (NCR) iti bilangna a 13,484,462 ken Region III (Central Luzon) nga addaan iti 12,422,172 a populasion.
Ti nagtitipon a populasion dagitoy a tallo a rehion, ibagianda ti agarup 38.6 a porsiento ti populasion ti Filipinas iti 2020, segun iti PSA.
Dagiti tallo a rehion a kababaan iti populasion: Cordillera Administrative Region (CAR) nga addaan iti 1,797,660; Region XIII (Caraga) nga addaan iti 2,804,788; ken Region IV-B wenno Mimaropa (Oriental Mindoro, Occidental Mindoro, Marinduque, Romblon, Palawan) nga addaan iti 3,228,558 a populasion.
Kuna ti PSA a ti Region IV-A (Calabarzon) ti addaan iti kadakkelan a panagngato iti 1,780,268 a populasion manipud iti sensus ti populasion iti 2015 (POPCEN 2015).
Ti met Bangsamoro Autonomous Region in Muslim Mindanao (BARMM) ti kapartakan ti panagdakkel ti populasionna a rehion manipud iti POPCEN 2015 nga addaan iti tinawen a PGR a 3.26 percent manipud 2015 agingga iti 2020.
Ti met Region VIII (Eastern Visayas) ti kabuntogan iti PGR a 0.50 porsiento.
(Damag manipud iti Manila Bulletin.)
