Pormal a naluktan ti naikalawa a Pantalan ti Salomague iti Cabugao, Ilocos Sur itay Hulio 8, Huebes. Manamnama nga agbalin daytoy a maysa kadagiti pantalan iti pagilian a para iti biahe a cruise.
Kas kuna ni Dip. Deogracias Victor Savellano ti Ilocos Sur a no di gapu iti pandemia, nakapasangbay koman ti napabaro ken napasayaat a pantalan kadagiti sumagmamano nga international cruise ship manipud pay iti apagtapog ti Enero idi 2020.
Segun ken ni Savellano, arapaap a pimmudno kadagiti umili iti Ilocos Sur daytoy pannakapabaro ti pantalan. Saan a naus-usar ti pantalan iti nabayag a tiempo ngem gapu iti pannakapasayaatna, dua a cruise ship ti simmangladen itay napan a tawen. Manamnama koma a sumanglad ti maikatlo a barko iti Marso itay napan a tawen ngem saan a natuloy gapu iti lockdown. Nupay dakkel ti epektona ti lockdown, naitultuloy ti proyekto a kas panagsagana iti "baro a normal."
Nagyaman pay ni Savellano iti administrasion ni Presidente Duterte ken iti Department of Transportation (DOTr) nga idauluan ni Secretary Arthur Tugade ken iti Philippine Ports Authority (PPA) nga idauluan ni General Manager Jay Daniel Santiago gapu iti pannakaikalawa ti pantalan.
Manipud Kadagiti Agdama a Kameng ti Bannawag: Dios ti Agngina!
Nairaman iti pannakapasayaat ti Pantalan ti Salomague ti reinforced concrete (RC) Platform Back-Up Area ken RC Pier Extension. Babaen daytoy, manamnama a mapaadu dagiti agsanglad a cruise ship iti Amianan a Luzon a yan dagiti heritage sites.
Innayon ni Savellano a kalpasan ti pandemia, mangnamnama dagiti opisial ken umili ti Ilocos Sur nga ad-adda a nakasagana a mangsangaili kadagiti turista aglalo ket agtultuloy ti pannakapasayaat ti Vigan Airport malaksid iti pannakaikalawa dagiti kalsada.
Ginutigot met ni Tugade dagiti residente ti Ilokos nga agsaganada para iti "baro a normal" ta iti pannakapasayaat ti pantalan, mangawis iti ad-adu pay nga agipuonan wenno imbestor ken oportunidad para iti trabaho nangruna iti industria ti turismo.
Tapno masupusopan ti napasayaat a pantalan, mapaspasayaat met ti Vigan Airport tapno maparegta ti turismo iti daytoy a deppaar.
Kinuna pay ni Tugade nga apaman a makompleto ti pannakapasayaat ti Vigan Airport, makapagserbi daytoy kadagiti daddadakkel nga eroplano a kaipapananna met ti ad-adu pay a biahe ken pasahero.
Maisaysayangkat pay dagiti sabsabali a proyekto a kas iti pannakapasayaat dagiti pantalan iti Sta. Catalina ken San Esteban iti Ilocos Sur met laeng iti panggep a pannakaipaay ti ad-adu pay nga oportunidad kadagiti agindeg iti Kailokuan.
(Damag manipud iti Philippine News Agency ken Manila Bulletin.)
