Nagpadispensar ti World Bank Philippines idi Huebes, Hulio 8, iti gobierno ti Filipinas ken iti Departmento ti Edukasion (DepED) iti “di nairanta” a panangiruarna iti report a nagkuna a 80 a porsiento kadagiti estudiante a Filipino ti “agkurang ti ammoda iti rumbeng koma nga ammoda,” kas maibatay iti agdama a tukad wenno grade level a yanda.
Iti pakaammo ti World Bank Philippines nga impaskilna iti website daytoy, kunana nga agdawat iti dispensar ta inruarna ti nasao a report sakbay a maalana ti kaudian a report manipud iti DepEd.
Malaksid iti panagpadispensarna, binigbig met ti World Bank dagiti gannuat ti departamento a mangpaspasayaat iti kalidad ti edukasion.
Sakbayna, idi Hulio 5, kiniddaw ni Education Secretary Leonor Briones ti panagpadispensar ti World Bank iti publiko kalpasan ti “pannakainsulto ken pannakaibabain” ti Filipinas iti pannakairuar ti nasao a report.
Iti ngamin inruar ti World Bank a report, kunana a maysa iti tunggal 4 nga estudiante a Filipino iti Grado 5 ti addaan iti laing iti Math ken iti panagbasa (reading) a kas iti laing nga adda iti maikadua ken maikatlo a grado.

Iti isu met laeng a report, naammuan nga uppat iti kada lima nga agtawen-iti-15 nga estudiante ti di pay makaammo kadagiti konsepto iti matematika a kas iti decimal ken fraction a rumbeng koma a naipaulodan idi addada iti maikalima a grado iti elementaria.
Mainaig itoy, kinuna ti Malakanyang, babaen ken ni Presidential Spokesman Harry Roque, iti pannakiumanna kadagiti kameng ti prensa idi Hulio 1, Huebes, a makapadanag ti linaon ti nasao a report. Kas kunana, “This is very disturbing po and very alarming.”
Kinuna ti World Bank a nakisaritan ken ni Briones maipanggep itoy a report ket mangnamnama iti agtultuloy a panagkadua ti World Bank ken DepEd iti tay-ak ti edukasion.
(Damag manipud iti Manila Bulletin.)