Ni LEILANIE G. ADRIANO

SIUDAD TI LAOAG – Dua a baro nga scholarship grants ti idiaya ti gobierno probinsial ti Ilocos Norte iti daytoy nga school year kadagiti estudiante nga interesado iti agrikultura ken panagpatan-ay iti ikan, kasta met kadagiti arte.

Kuna ni Carolyn Juan Agcaoili, pannakabagi ti Provincial Education Office, a mapan a 300 nga slots ti para iti sekundaria idinto a 80 iti tersiario.

Iti pannakasursurat daytoy iti umuna a kinsenas ti Hunio, kuna ni Agcaoili a madama ti pannakaarisit dagiti aplikante. Para kadagiti scholarship grants iti agrikultura ken panagpatan-ay iti ikan, maipaay daytoy kadagiti adda iti Grade 9 ken Grade 10 idinto nga iti kolehio, maipaayan iti scholarship grant ti 20 nga estudiante iti kada agpang.

Maibasar iti katulagan, umawat iti dua ribu a pisos nga stipend iti kada bulan dagiti iskolar iti sekundaria nga agpang.

Dagiti met iskolar iti kolehio iti umuna ken maikadua a tawen, umawat ti tunggal maysa iti lima a ribu a pisos iti kada semestre sa sabali pay a lima a ribu a pisos a para iti laboratory fee.

Para kadagiti estudiante iti maikatlo a tawen, umawat ti tunggal estudiante iti lima a ribu a pisos a binulan nga stipend, sa nayon a sangapulo ribu a pisos a grant para iti panagsurat iti thesis sa sabali pay a lima a ribu a pisos a kas tulong iti laboratory fee.

Umawat met ti tunggal estudiante nga adda iti maudi a tukad iti lima a ribu a pisos para iti thesis defense sa lima ribu a pisos para kadagiti miscellaneous fees malaksid iti lima ribu a pisos a binulan nga stipend.

Segun ken ni Agcaoili, mainayon dagitoy dua a baro nga scholarship grants ti probinsia kadagiti maiwaywayaten nga scholarship grants para kadagiti nasaririt nga estudiante, lider dagiti agtutubo, atleta, ken estudiante iti medisina.

Naisangrat dagitoy dua a baro nga scholarship grants a pangguyugoy iti ad-adu pay nga agtutubo a mangala kadagiti kurso iti agrikultura ken panagpatan-ay kadagiti ikan ken para iti pannakaparubrob ti panangapresiar dagiti agtutubo iti visual arts, drama ken theater, music arts, creative writing ken dance arts, ken kapadada.

Iti agdama, aganay a 2,615 nga iskolar manipud iti senior high school agingga iti kolehio ti supsuportaran ti gobierno probinsial ti Ilocos Norte.

(Immuna a naipablaak iti Hulio 1-15, 2021 a bilang ti Bannawag.)