“MAESTRO PLANTITO” TI KAILOKUAN. Daytoy ni Maestro Joeffrey Balmaceda a tubo ti Barangay Poblacion, Pudtol, Apayao ngem agnaeden iti Siudad ti Laoag. Babaen ti impluensia ti maysa a maestro met laeng a kaobraanna a naessem kadagiti mula, nasursurona ti ag-graft ket ti adenium wenno desert rose ti nakaiturongan ti imatangna. Malaksid a makaay-ayo daytoy aglalo no tiempo iti panagsabongda, naganar met iti merkado aglalo no dagitay haybrid wenno multi-grafted ti sabongna. Idi damdamona, pasaray makangngeg iti sao ken ni baketna a maestra met laeng ta imbes a para gatas koma dagiti annakda, isamirana latta ti gumatang kadagiti nangingina a klase ti adenium sa i-graft-na tapno umaduda. Idi agangay, nagbalinen daytoy a nayon ti pamastrekanda nga agassawa ket arigna makilumba payen ni baketna nga aglako kadagiti patanorna. Iti Siudad ti Laoag, maysa ni Balmaceda a daydaywen dagiti parokiano a kaaduan ket balikbayan gapu iti kinalapsat dagiti patanorna nga adenium. Saan laengen a para gatas ti isapsapulanna gapu ta adu payen ti napundarda nga agassawa gapu iti daytoy nga panagessemna iti mula. (LEILANIE G. ADRIANO)

(Naipablaak iti Hulio 1-15, 2021 a bilang.

Kadagiti kayatna ti ag-subscribe iti e-Edition, mapan iti ania man kadagitoy a link: Press Reader wenno iti Magzter.

Para iti naimaldit a kopia, ag-email iti [email protected] wenno kauman ni Boy Balanag iti CP Number 0916 269 2390

Laglagipenyo koma met, kakailian, nga i-like daytoy FB Page ti Bannawag Magazine. Dios ti agngina.)