Dandaniw ni HONOR BLANCO CABIE
1
nakaarpaw 'diay annangada 'ti
likudda a nakapagan-anay,
agar-arbis ngem dida agtaray
mapan pay la aglinong, agpakni.
Manipud Kadagiti Agdama a Kameng ti Bannawag: Dios ti Agngina!
ituloyda daydiay natakapda
iti panagraep kakellengan,
adda met sangapuloda, anian
ragsak ken 'tay panagiinnuna.
nasekka a bunubon ta addan
iti aglawlawda nga agraep,
apagbiit bunubon maikimos,
di agbayag kelleng maraepan.
naragsak dagiti agraraep:
ay! umis-isem met ni apo dios.
2
iti ungtot' tambak ti talon 'diay
sang-at no panawen panagraep
iti sidiran dagiti bantay,
mannalon agyamyaman 'ti nepnep.
iti murdong uppat a metro ti
katayag a kawayan maipasdek
iti tambak agyaman ti puli:
panagraepda addaan pasnek.
kalasukos daytay inkabilda
'ti sabsabut, 'diay panagyaman 'tay
adda't kawayan nga intugkelda,
'tay atang a mangted panagrang-ay.
ugali da kalugarak innak
nabuya nangpapigsa't karkarmak.
3
daytay nayatang a kalasukos
iti murdong kawayan naitugkel
ungtot' tambak, atanud, nagtukel
metten kabigatan -- ay! apo dios.
daydiay daytay insagut dagiti
mannalon bareng no adunto kan
anien, apiten 'ti kakellengan --
daydiay daytay panagkurnot' puli.
daydiay simbengda a nagraraep,
'tay agsisilpo a ragragsakda,
nangtubay mugingko ken 'toy riknak:
kadakami adda nam-ay nepnep.
ragsakda ta indakkelko ida,
inilut-ilutda 'toy karkarmak.
