Ni GABRIELA BARON
Binallaagan ti Philippine Society of Allergy, Asthma, and Immunology (PSAAI) ti publiko kontra iti panangalada iti antibody testing kalpasan ti panagpabakunada kontra iti coronavirus disease (COVID-19) tapno maamiris ti lebel wenno agpang ti proteksionda kontra iti bayrus.
Iti maysa a pakaammo a nairuar idi Sabado, Hulio 10, kuna ti PSAAI a di pay naamiris dagiti antibody test no maarisitna wenno saan ti agpang ti kinaresistensia ti bagi kontra iti COVID-19 kalpasan ti pannakabakuna kontra iti nasao nga angol.
Innayon daytoy a ti mapagduaduaan a resulta ti antibody test ket mabalin a “mangparnuay iti palso a panangipapan iti proteksion, ket ngarud agbalin a natalged dagiti tattao a pagangayanna, dida unay suroten dagiti pagannurotan iti pannakaaywan ti salun-at.”
Segun kadagiti eksperto, saan pay a madeterminar ti lebel ti antibody a mangipaay iti proteksion kontra iti COVID-19 ket agpapan pay a ti resulta ti test ket “positive” qualitative wenno “high” qualitative, dina maipasingked a ti tao ket addaan iti umdas a proteksion kontra iti COVID-19 kalpasan ti pannakabakuna daytoy.
Manipud Kadagiti Agdama a Kameng ti Bannawag: Dios ti Agngina!
Kuna ti PSAAI a ti positibo a resulta ti antibody test, mabalin a yindikarna ti immun-unan a pannakaimpektar iti COVID-19 wenno proteksion iti antibody kalpasan ti pannakabakuna. Masapul ti ad-adu pay a panagsukisok tapno maawatan ti kaipapanan ti positibo wenno negatibo nga antibody test malaksid laeng iti kaadda wenno kaawan dagiti antibodies.
Innayon ti PSAAI a dagiti bakuna kontra COVID-19, saanda laeng a riingen ti humoral arm ti immune system a mangparparnuay kadagiti antibodies no di pay ket ti cellular arm a manginaig kadagiti T cells. Daytoy maparnuay nga imunidad ti T cell, saan a marukod ti ania man nga antibody test.
Itay Hunio, inlawlawag ti Department of Health (DOH) a ti negatibo nga antibody test, dina kayat a sawen a saan a simmamay ti bakuna kontra iti COVID-19.
Imbalakad nga agpada ti Food and Drug Administration ken ti Centers for Disease Control ti Estados Unidos iti publiko ti dida koma panagpa-test iti lebel ti antibody tapno madeterminar no protektadoda kalpasan ti panagpabakunada.
Iti kaudian a rekord a naala itay Hulio 9, agdagupen iti 12,703,081 ti dosis ti bakuna kontra COVID-19 ti naipaay iti entero a pagilian.
Mapan met a 9,493,839 nga indibidual ti nakaawaten iti umuna a dosis, idinto a ti 3,209,242 ti addaanen iti kompleto a bakuna.
(Damag manipud iti Manila Bulletin.)
