GENEVA, Switzerland – Dinillaw ti World Health Organization ti “kinaagum” dagiti nababaknang a pagilian a mangipampamaysan iti panagbakuna iti booster kontra iti COVID-19 idinto a kaaduan pay laeng a nakurapay a pagilian ti awanan iti proteksion kontra iti bayrus.
Iti nakaddidillaw a makaunget a panagyebkasna, kinuna ni Tedros Adhanom Ghebreyesus, hepe ti WHO, a mabain ti lubong iti bukodna a bagi no pilien daytoy a baybay-an dagiti nakakapsut (a pagilian) nga atiwen ti pandemia.
Inungtan met ti health agency ti UN dagiti agparpartuat iti bakuna iti panangipangrunada kadagiti kontrata para iti booster a maikatlo a dosis imbes a ti umuna ken maikadua a dosis para kadagiti di pay nabakunaan a healthcare workers ken nataengan kadagiti nakukurapay a pagilian.
Iti maysa a pannakiumanna kadagiti agiwarwarnak, kuna ni Tedros a masansan a masaludsod kenkuana no kaano nga aggibus ti pandemia.
Manipud Kadagiti Agdama a Kameng ti Bannawag: Dios ti Agngina!
Iti biang ni Tedros, kinunana a kabaelantayo koma a gibusan iti mabiit ti pandemia gapu ta addaantayon kadagiti ramit ngem saan a mapasamak daytoy gapu iti kinaawan ti napinget a liderato iti sangalubongan.
Innayon daytoy a mapabpabayag ti panagrigrigat ti sangalubongan gapu iti kinaagum.
Para kenkuana, saan a praktikal ti panagbakuna kadagiti booster idinto a madama pay laeng ti panangatakar ti bayrus kadagiti sabsabali a paset ti lubong.
Segun ken ni Soumya Swaminathan, hepe a sientista ti WHO, addan uppat a pagilian a mangipakpakaammo iti kaadda ti programa dagitoy iti booster idinto a pampanunoten metten ti dadduma pay a nababaknang a pagilian ti sumaruno kadakuada.
Impaganetget daytoy nga iti agdama, awan pay ti sientipiko a pammaneknek a talaga a kasapulanen ti booster.
Kinuna met ni Tedros nga imbes nga ipangruna ti Moderna ken Pfizer ti mangsuplay kadagiti bakuna a booster kadagiti pagilian a protektado metten ti kaaduan a populasionda, ipennekda ketdi koma ti agipatulod iti suplay iti Covax-- ti programa nga agpanggep a mangipaay iti bakuna kadagiti pagilian nga agsagsagaba iti nakaro gapu iti pandemia.
Iti biang met ni Michael Ryan, emergencies director ti WHO, kunana nga iti tiempo ti krisis, umun-una koma a panunoten no asino dagiti rumbeng unay a masaranay.
(Damag mamaipud iti Agence-France-Presse ken Manila Bulletin.)
