Kastoy ti mangala iti National ID wenno Phil ID manipud iti Philippine Statistics Authority iti babaen ti programa ti gobierno ti Filipinas a Philippine Identification System (PhilSys):

1. Umuna nga Addang (Step 1) : Mabalin ti agparehistro online iti: https://register.philsys.gov.ph/ No nakapagpalistakan iti babaen ti “house-to-house collection” (adda immay nangilista iti naganmo), saan a maibalakad nga agparehistroka manen online tapno maliklikan ti panagparikutmonto iti rehistrasionmo. Urayem laengen ti maibaga a sumaruno nga aramidem (Step 2). Mapakaammuankanto babaen ti pakakontakan kenka nga intedmo iti PSA. Iti agdama, dagiti laeng agnaed iti Filipinas a makipagili a Filipino ti kualipikado nga agparehistro online.
2. Maikadua nga Addang (Step 2): Mapanka a mismo iti naituding a pagparehistroan (registration center) para iti biometric information collection ken pannakapaneknek a sika a mismo ti tao a maikkan iti National ID (mangitugotka iti balido nga ID wenno ania man a mangipaneknek iti kinaasinom). Kuna ti PSA nga addan dagiti registration center a linuktanna para iti 78 a probinsia iti sibubukel a pagilian. Maibalakad kadagiti nagparehistron a mabalinda ti ag-online appointment booking iti ania man kadagiti linuktanna a 415 a registration centers kadagitoy a probinsia. Kitaen ti kaasitgan kenka a registration center iti PhilSys website.
   Iti pakaammo ti PSA itay Hulio 14, mapalubosanen dagiti agtawen iti 15 agingga iti 17 ken dagiti agtawen iti nasursurok ngem 65 a mapan a mismo iti ania man kadagitoy a registration centers para iti biometric information collection. Nupay kasta, dagiti menor de edad, masapul a kaduaen ida ti nagannak wenno agaywan kadakuada. Nasken laeng a surotenda dagiti annuroten iti pannakasaluad ti salun-at itoy a panawen ti pandemia.
3. Maikatlo nga Addang (Step 3): Pannakaited ti PhilSys Number wenno PSN ken pannakaideliber ti Philippine ID.
   Maited ti National ID, kas sagudayen ti Philippine Identification System Act (Republic Act No. 11055). Daytoy nga ID ti opisial a National ID ti pagilian ken agpaay a kakaisuna a pammaneknek iti kinaasino a mausar iti ania man a transaksion iti gobierno wenno iti pribado a sektor. Awan met ti expiration date daytoy nga ID.

Eksklusibo iti Website

Manipud Kadagiti Agdama a Kameng ti Bannawag: Dios ti Agngina!