Ni CHARISSA LUCI-ATIENZA
Naimbag a damag kadagiti naayat iti kalamay ken ubi!
Naduktalanen dagiti para sukisok ti gobierno no kasano a mapagpaut ti shelf life wenno ti di pannakadadael dagiti sinam-it ti Rehion 1 a kas iti kalamay ken ubi kalpasan ti pannakaisaganada, kas impadamag ti Department of Science and Technology (DOST) idi Mierkoles, Hulio 14.
Inreport ti Pangasinan State University – Food Innovation Center (PSU-FIC) iti DOST Regional Office I (DOST-I) ti naballigi a pannakaisayangkat dagiti dua a proyekto daytoy maipapan iti panagpasayaat iti makan a nagbunga met iti pannakapasayaat ti kalidad dagiti sinam-it ti Rehion 1.
Impresentar ni Meryl Bernardino ti report maipapan iti “Candon Calamay & Ube Project” iti DOST-I. Kasta met nga indanonna iti DOST-I ti istatus ti panagadal maipapan iti Smart Foods for the New Normal: Development of Functional Intermediate Ingredients, Ready-To-Eat Nutritious Food Packs and Ready-To-Drink Probiotic Drinks in Ilocos Region.
TURISMO: Intayon Idiay Ayuyang Garden iti Pila, Siudad ti Laoag!
Nairaman iti tungtongan da Dr. Paulo V. Cenas, bise presidente para iti research, extension & innovation ti PSU; Dr. Racquel Pambid, pangulo ti PSU-FIC, ken dagiti agsuksukisok a karaman kadagiti proyekto a da Dr. Veronica C. Austria ken Dr. Wilma M. De Vera.
Bayat ti deliberasion, naiparang ti grupo ti PSU-FIC ti naballigi nga inobasion iti Candon Calamay & Ube Project ta nakapasa dagiti produkto kadagiti test para iti kinatalged dagiti agpasar wenno mangan kadagiti sinam-it ken ti pannakaay-ayo dagiti konsiumer.
Inrekomendar ti grupo ti PSU-FIC a ti nadebelop a teknolohia, mayawat kadagiti benepisiario para iti pannakaipakatna. Karaman kadagiti benepisiario ti Candon Calamay Processors of Ilocos Sur ken ti Agoo Ube Processors of La Union.
Kuna ti DOST-1 a babaen daytoy, manamnama ti ad-adda pay a panagdur-as ti industria ti lokal a sinam-it iti Rehion 1.
(Damag manipud iti Manila Bulletin.)
