Ni CHARISSA LUCI-ATIENZA

Kanayon nga igunagunam ti vaccine expert panel (VEP) ti pagilian kadagiti amin a Filipino ti panagpabakunada kontra iti coronavirus disease (COVID-19).
Gapu iti mabalin a panagpeggadtayo iti “nakarkaro” ken “naparpardas ti panagwarasna” a baryant, kinuna ni VEP chairperson Dr. Nina Gloriani nga adda walo a rason no apay a nasken ti panagpabakuna kontra iti COVID-19.
• Ikabassit ti bakuna ti panagpeggad iti impeksion wenno iti gundaway a pannakakapetmo iti COVID-19.
• No bilang makapetnaka ti COVID-19, matulongannaka ti bakuna a saanka nga agsakit iti nakaro; mabalin a makariknaka laeng iti nalag-an a sintoma ken dakkel ti posibilidadna a saankan a mayospital ken mailiklikka iti ipapatay.
• Maibilangkan iti grupo dagiti masalakniban ken makatulongka iti “herd immunity” wenno grupo dagiti tattao a saanen a kapten ti nasao a sakit; iti kasta, saanen a makapagwaras ti bayrus.

• Masalaknibam dagiti ipatpategmo iti biag ken dadduma pay a tattao.
• Babaen ti pannakabakunam, makatulongka iti saan a panagwaras ti bayrus. Adda pay dagiti ebidensia nga agkuna a dagiti nabakunaan a tattao a mabalin a maimpektaran iti coronavirus ket basbassit ti bilang dagiti bayrus nga adda iti agong ken ngiwatda. Ngarud, dakdakkel ti tiansa a dida maakaran dagiti tattao a nalaka nga agsakit iti nakaro.
• Ad-adun ti maaramidam.
• Mabalin a saantayonton nga agaramat iti face mask ken face shield ken saanton a nasken nga agiinnaddayotayo ket iti kasta, makalangenlangentayonto manen dagiti ipatpategtayo iti biag a kas iti dati.
• Makatulong dagiti nabakunaan a tattao iti saanen a pannakaparnuay dagiti dadduma pay a baryant ti COVID-19.
Kinuna ni Dr. Gloriani nga iti agdama, addan 16-milion a dosis ti bakuna a naibakuna kadagiti umili. Impanamnamana met a dagiti naikkanen iti umuna a dosis, maipaayto met kadakuada ti maikadua a dosis. Iti kasta, mapadakkel ti tiansa a mailiklikda iti pannakakapetda iti COVID-19 ken kadagiti baryant daytoy.
(Damag manipud iti Manila Bulletin.)