Ni WAYLON GALVEZ

Tinungpal ni Hidilyn Diaz, maysa a weightlifter, ti kari daytoy a mangigibus iti ibbong a rekord ti Filipinas iti balitok a medalia iti Olympics babaen ti panangabakna iti kategoria a 55-kilogram iti women’s weightlifting iti 2020 Tokyo Olympics iti Tokyo International Forum itoy a Lunes, Hulio 26.

Ni Hidilyn Diaz ti Filipinas bayat ti pannakisalisalna iti women’s 55kg weightlifting iti Tokyo 2020 Olympic Games iti Tokyo International Forum idi Hulio 26, 2021. (AFP)

Lima a tawen kalpasan ti panangyalatna iti pirak (silver) a medalia iti Rio Olympics, sibaballigi ni Diaz a nangitag-ay iti 127-kilo—maysa a rekord iti Olympics—iti maikatlo ken maudi a panangpadasna iti clean and jerk a nangipaay kenkuana iti dagup a 224 a kilo a maysa met laeng a rekord iti Olympics. Iti snatch, 97 a kilo ti intag-ayna.

Ni Liao Qiuyun ti China ti nangyalat iti maikadua para iti pirak a medalia babaen ti dagup a 223 a kilo (97 a kilo iti snatch ken 126 a kilo iti clean and jerk), idinto a ni Chinshanlo Zulfiya ti Kazakhstan ti maikatlo para iti bronse a medalia babaen ti dagup a 213 a kilo (90 a kilo iti snatch ken 123 a kilo iti clean and jerk).

Makalulua ni Diaz a nangrambak iti balligi daytoy kaduana ti “HD Team” a buklen da Kaiwen Gao (mentor nga Intsik), Julius Naranjo (strength and conditioning coach), Dr. Karen Trinindad (psychologist), ken Jeaneth Aro (sports nutritionist).

Eksklusibo iti Website
Manipud Kadagiti Agdama a Kameng ti Bannawag: Dios ti Agngina!

Manipud Kadagiti Agdama a Kameng ti Bannawag: Dios ti Agngina!

Natalgeden ti puesto ni Diaz iti pantok ti balligi iti tay-ak ti isport iti pagilian, kaabayna dagiti kas kada Manny Pacquiao (mabigbig iti sangalubongan iti tay-ak ti boksing), kas kakaisuna nga atleta a nangyalat iti medala iti Olympics—ti medalia a pirak daytoy iti 2016 ti nangigibus iti 20-tawen a pannakaibbong ti Filipinas iti Olympics. 

Daytoy a medalia ni Diaz ti maika-11 a medalia ti Filipinas manipud nakisalisal ti pagilian iti Olympics idi 1924, ket ita, kakaisuna a balitok. 

Ni Diaz pay ti maikadua nga atleta ti pagilian a nangyalat iti ad-adu ngem maysa a medalia iti Olympics, kaduana ni Teofilo Yldefonzo ti Piddig, Ilocos Norte a maysa a swimmer a nangabak iti bronse iti men’s 200m breaststroke idi 1928 ken 1932.

(Damag manipud iti Manila Bulletin.)